BJP ten Chief Minister atan Ajit Pawar hual lawk ti

Bharatiya Janata Party (BJP) tena Sharad Pawar kaihhruai Nationalist Congress Party (NCP) tiphela a nephew Ajit Pawar an lak chuan rorel lai mek Eknath Shinde kaihhruai Shiv Sena te politics hma lam hun chianglo takin a siam zawka ngaih a ni.
Pathianni khan Ajit Pawar chu hnawhsarumin NCP legislator dang pariatte nen sorkar-ah lakluh niin Deputy Chief Minister atana lakluh nghal a ni a, a hnuah Ajit Pawar chu Chief Minister la ni tura tia sawi a ni.
Tun hnaiah BJP hruaitu lawk te chuan zirchianna an neih hnuah BJP leh Shinde faction te chuan kum 2024 general election leh Assembly election an hmachhawn a nih chuan an che chhe hle dawn tih an hriat avanga tuna Ajit Pawar hi lalut ta nia sawi a ni a.
Congress leader Prithviraj Chavan leh Shiv Sena (UBT) leader leh Uddhav Thackeray loyalist Sanjay Raut te chuan BJP te chuan Ajit Pawar chu Chief Minister atan an thlem an ti bawk a, Shinde camp a rebel MLA 16 te chu disqualify an nih chuan Chief Minister a ni zui mai dawn an ti.
“Assembly Speaker Rahul Narvekar an SHiv Sena elbel MLA 16 Shinde camp a mi te chu kumin August thla chawlhkar hnihna hmaa Supreme Court-in thuremna a siam hmaa a disqualify a nih chuan Ajit Pawar chu Shinde ban a nih chuan CM post tiam a ni,” tiin Chavan chuan a sawi.
Shinde camp leader lam te chuan Maharashtra Cabinet tihlen thawhhnihna an nghahmek laiin NCP leader pakua te Ajit Pawar tela sorkar a lakluh leh a ni chuan Shinde Sena MLA te chu a tilawm lo hle tia sawi a ni bawk a.
Shinde-an nikum June thlaa BJP te puihnaa Shiv Sena te tiphela chet an lak hnuah Shinde rebel MLA te chuan BJP hlimthla hnuaiah identity an nei hleithei meuh lo tia sawi a ni bawk a.
Senior political analyst Vivek Bhavsar chuan Shinde camp legislators te chuan an helna chu NCP ten Uddhav Thackeray kaihhruai MVA anga an awm khawm laiin tihchhiat an tum tih chu an tanfung a ni a, Uddhav Thackeray chu Hindutva ideology hnawla Congress leh NCP te nena inzawm thlang zawkah an puh bawk a ti.
“Shinde faction te lungawilohna ber thin chu Ajit Pawar Deputy CM a nih laiin funds te pawh NCP MLA te constituency atan chauh hman a ni thin an ti a. Mahse, vawiinah chuan lohtheihlohin BJP tena an lama Ajit Pawar an lakluh tak bawk si avangin lung ni lo em em pawh ni se pawm lo thei lova siamin an awm mek,” tiin Bhavsar chuan a sawi.
Shinde camp te chu Lok Sabha inthlanah an chak theihna a tlem hle in a lang tawh a, hei tak hi BJP te chuan an thatpui dawn lo tih an manfiah tawh tiin a sawi bawk a.
“CM a hlankai a nih chuan Ajit Pawar chuan thlawp a remti a. Tawnhriat a neihthatna leh administrator tha a nihna chu BJP te chuan Shinde aiin asset tling zawkah an ngai a. Pahnihnaah chuan BJP te chuan Maharashtra-ah chuan Brahmin hmatawnga hmanga Devendra Fadnavis zawrh chuan awmzia a nei dawn lo tih an hre bawk a. Hei vang tak hian CM atan chuan Maratha leader Ajit Pawar chu tihmakmawhah an ngai a ni,” tiin Bhavsar chuan a sawi bawk.
BJP leh Shinde faction te inlaichinna chu tun hnaia Assembly leh Legislative Council byelection neiha an chet chhiat em avangin a tha lo char char tia sawi a ni bawk a. Nikum June thlaa Shinde te hel atangin Opposition MVA coalition lamah mipui an awn zawk char char tia sawi a ni bawk.
October 2022-a Andheri East byelection-ah pawh BJP te chuan Uddav Thackeray kaihhruai Sena faction te lakah an chak zo dawn chuang lo tih an man hnuah an candidate chhawpchhuah Murji Patel chu an inhnuhdawhtir leh ngawt bawk a.
Kumin February thlaa Maharashtra Legislative Council poll ah pawh seat nga awmah MVA te chuan seat thum an la a, constituency pawimawh tawpa ngaih Nagpur teachers’ constituency leh Amravati graduates’ constituency ah pawh an chak tlat zawk a. MLC poll-ah khan Shinde group te chu awmze nei pha lo tia sawi an ni bawk.
Thla kalta khan Pune (Kasba Peth and Pimpri-Chinchwad) byelection ah pawh MVa coalition te chu an chak zawk tlat a, helai hi BJP tena kum 30 chhum lo chat lova rorelna an lekkawh tawhna a ni.
Shinde an harsatna a neih ber tia Pune-based analyst Rajendra Pandharpure an a sawi chu Chief Minister a nih hnuah pawh Thane belt tih lohah chuan awmzia a nei thuk thei vak lo chu a ni a ti bawk a.
“Shinde hian sorkar paihthlaka chet an lakna chhan chu NCP te laka Shiv Sena humhim nan leh bal Thackeray a ‘hindutva’ ideals humhimnan tih chu chhuanlama a hman ber a ni a. Mahse, mipui ten tizawng chuan an ngaihsak ve der si lo. MLC byelection result chuan Thackeray hmangin awmzia a la neihzia leh meichher chhi zeltu chu Uddhav zawk a ni tih chu an tilang a ni,” tii Pandharpure chuan a sawi.
Chutih laiin BJP te chuan Shinde camp lam chu thlahthlam an tum zel nia sawi a ni a. Chutih rual chuan Shinde MLA rualte chu BJP-NCP combine Ajit Pawar te lakah chuan ngaihmawhawm tak an ni zui thei tho an ti bawk.
“BJP te chuan Shinde tihlawm nan amah emaw a fapa Shrikant Shinde te chu Centre-ah an lalut thei a, mahse, MLA dang zawngte chu engtin nge ni ang tih chu zawhna lian tak a ni. BJP te nen an inzawm mai ang nge Uddav Thackeray lamah an let leh dawn. Hmun siamsak ve loh zawng te chu BJP te tana hnawksak an ni dawn tho,” tiin Mumbai-based analyst chuan a sawi bawk. Hengte avang hian Maharashtra politics chu a la buai zui zel rih dawnin analysts te chuan an ngai a ni.