BJP ten JPC din an duh lo bur

Bharatiya Janata Party (BJP) leh Congress te chu Hindenburg Research tena Securities and Exchange Board of India (SEBI) chairperson Madhabi Puri Buch chungchang an lailang leh puhnaah inbei zui zelin Opposition Congress tena Joint Parliamentary Committee (JCP) chhuichian an ngiatna chu an hnawl thu an sawi.
BJP te chuan Congress te chu Hindenburg Research hmanga ‘conspiracy’ leh ‘toolkit gang’ hmanga Indian economy tihchhiat tum a, Thawhtannia stock market crash a siama economic anarchy awm se an duh a ni an ti a. Mahse, investor ten Congress thil tum te hmu lawkin market chu ngelnghet takin a la kal zel theih phah a ni tiin BJP leader leh Union Minister hlui Ravi Shankar Prasad chuan a sawi.
Prasad chuan billionaire George Soros chu Hindenburg-a investor a ni tia sawiin Soros chu ‘Prime Minister Narendra Modi sorkar duh lova propaganda kalpui a ni’ a ti bawk.
“Thil chiang tak chu Congress leadership tena Prime Minister an huat ang bawkin Hindenburg te hian an hua a, an huatna te chu India huatnaah a chang tawh a ni” tiin Prasad chuan sawiin hindenburg report chu ‘zeldin’ tiin a sawi bawk.
“Congress-te hian Jawaharlal Nehru hun laia India-in harsatna namen lo a tawh laia ‘Control Raj’ hun laia let leh an duh em ni? P.V. Narasimha Rao a nih kha Indian economy hawng zau tu chu ni zawk. ‘Toolkit gang’ te hian India hmasawnna an ngaihsak lo, kum 55 lai ram chhunga rorelna lekkawh tawh Congress te lakah hian eng nge thleng ta zawk le” tiin Prasad chuan a sawi bawk.
Tun hnaia Hindenburg report behchhanin Congress te chuan Modi sorkar nawrna hle in JPC din a nih loh chuan ram pum huapa lungawilohna lantirah an vau a. Congress te chuan Supreme Court pawh Adani group te SEBI in a chhuichianna chu Central bureau of Investigation emaw Special Investigation team emaw te hnenah hlan tura ngenin SEBI chhuichianna chu rin ngam a ni dawn tawh lo an ti bawk.
“SEBI chairperson ber, stock market regulate bertu tur leh credibility tha taka siama scam awm thei laka chet la tur berin Adani group te inhnamhnawihna shell company ah investment a ti tlat a. Sorkarin he thilah hian eng nge thlir dan a neih? Heti khawpa mawhpuhna nasa tak a awm tawh chungin Buch chuan a hna a la chelh reng a ni” tiin Congress general secretary (organisation) K.C. Venugopal chuan a sawi a. “Prime Minister in ngawih a chuh tlat bawk hian a rintlakna a tichhe zo vek” tiin a sawi bawk.
Kar kalta Inrinni khan Hindenburg Research, investment research firm activist te, short-shelling hmanga corporate fraud lailang thin tute chuan Buch leh a pasalte chuan Bermuda leh Mauritius-ah Adani Group Chairman Gautam Adani unaupa Vinod Adani entity hman tho hmangin offshore funds investment an kalpui tiin an sawi a ni.
Venugopal chuan, “Eng vangin nge sorkar hian JPC chu a hlauh em em?” tia sawiin, “Thil thup tur a awm tihna em ni?” tiin a sawi bawk a. Centre in JPC a din duh lo a nih chuan Congress leh INDIA bloc te chuan rampum huapin lungawilohna an lantir dawn a ti bawk.