Ukraine-in Russia ram 1,000 Sq Km thunun

Ukraine top commander chuan Kyiv sipaite chuan Russian ram chhung 1,000 sq km an thunun tawh tia sawiin ram pahnih tena kum hnih leh a chanve indona an kalpui tawh china Ukraine sipai tena Russia ram an luh thuk ber a thleng mek a ni.
Commander Oleksandr Syrskyi chuan Ukraine chuan Kursk region-ah offensive operation an neih chhunzawm zel tur thu a sawi bawk.
Ukraine President Volodymyr Zelensky chuan Russia chuan midangte lakah indona a kalpui pawp pawp a, a tawk ve ta a ni a ti.
Mahse Russian leader Vladimir Putin chuan Ukraine chetdan chu ‘inrunluihna’ tia sawiin Russia sipai te chu ‘ram atanga hmelmate umchhuak’ turin a hrilh thu a sawi ve thung.
Western Russian region atangin mithahnem tak hmun hima thiarchhuahin an awm tawh a, mi 59,000 chuang vel te chu an chenna in leh lo chhuahsan tura tihin an awm bawk.
Local governor chuan thingtlang khua 28 vel te chu Ukrainian sipaite kutah an awm tawh tia sawiin civilian 12 in nunna chanin thil awmdan a duhawm lo hle tiin a sawi bawk.
Kar kalta Thawhlehni khan Ukrainian sipai te chuan Russia ram lut thutin a nikhatnaah pawh 30km chhung vel an lut thei nghal a ni.
Ukrainian sipaite chet dan chuan phurna nasa tak a siam an tihrualin analysts te thung chuan Ukraine tan hlauhawm insiam zualna an ti ve thung.
Moscow thinrim lutuk chuan Ukrainian civilian population leh infrastructure a beihte chu a letin a tihpun hlauhthawnna a lian hle a ni.
President Putin chuan state television kaltlanga thusawia a neihah, “Hmelmate thiltum ber chu lungawilohna, buaina, mipuite tihthaihna leh Russian society inlungrualna leh inzawmna tihchhiat a ni” a ti a.
“Tuna thil pawimawh ber chu defence ministry in kan ram atanga hmelma te an umchhuah a ni” tiin a sawi bawk.
Kursk region governor chuan mi 121,000 te chu an chenna atanga hmun hima thiarchhuahin an awm tawh a ti a, Ukrainian sipai tena an awp mekah Russian khua leh tui 2,000 vel an la awm tiin a sawi bawk.
Kursk thenawm Belgorod region ah pawh mi 11,000 vel te chu hmunhima insaseng tura ngen an nih thu governor Vyacheslav Gladkov chuan a sawi bawk.
Hetih lai hian Kyiv a Zelensky nena meeting an neihnaah US Senator Lindsey Graham chuan Ukraine chet dan chu huaisenthlak a tih thu sawiin Biden administration chu ralthuam tam zawk leh mamawh ang te Ukraine hnena pe turin a ngen bawk a.
Russia ram chhungah pawh Ukraine-in Kursk region a la duai duai mai thei chuan ngaihthatlohna siamin pro-Russian war blogger, Yuri Podolyaka chuan thil duhawm lo a thleng mek tiin a sawi.
Russia Foreign Ministry thupuangtu Maria Zakharova chuan Russian armed forces te chhanletna khauh tak chu a thleng thuai ang a ti thung.