Black Sabbath final live show-ah Metallica leh Slayer inlan dawn

Black Sabbath final live show-ah Metallica leh Slayer inlan dawn
Heavy metal tana sulsutu pawimawh Black Sabbath chuan July ni 5 ian an live show hnuhnung ber neih tum an inbuatsaih mup mup a, an hun hnuhnungah hian rimawi khawvela hming langsar tak takin an tawimawm dawn a ni. He event-ah hian an band classic line-up – frontman Ozzy Osbourne, guitarist Tony Iommi, bassist Geezer Butler le drummer Bill Ward te chu tun kum 20 chhunga a vawi khat nan an play-ho dawn a, an rawn chawr chhuahna khua, Villa Park Birmingham, England-ah show hi an nei ang.
Black Sabbath live show hnuhnung ber tur neih tur hi Iommi leh an frontman Ozzy nupui Sharon Osbourne ten an puang a, he final show hmingah hian ‘Back To The Beginning’ tih a ni ang.
Ozzy pawhin thuchhuah siamin, “’Back To The Beginning’ tih a hun ta…ka pianna khua tana luanchhuah ve a hun ta e. Ka mi ngainat tak tak te nena kan tiho thei tur hi ka tan malsawmna a ni. Birmingham hi metal in pui dik tak a ni. Birmingham Forever,” a ti.
He show-ah hian Black Sabbath reunion bakah metal genre a huhang nei lian tak tak an inlan dawn a, chung zingah chuan Metallica, Slayer leh Anthrax te pawh an tel a, Pantera, Lamb Of God, Mastodon, Alice In Chains, Halestorm leh nimin lawka Grammy dawng Gojira te pawh an inlan dawn e.
Heng metal band bakah hian Smashing Pumpkins frontman Billy Corgan, Disturbed atangin David Draiman, Guns N’ Roses atangin Duff McKagan leh Limp Bizkit atangin Fred Drust te pawh an tel a, he show-a tel turte hi an la puan belh zel dawn a ni.
Rage Against The Machine guitarist Tom Morello chu ‘Back To The Beginning’-ah hian music director a ni dawn a, “Heavy metal show awm tawh zawng zawnga ropui ber a ni ang,” a ti.
He show atanga hlawkna awm te chu charity hrang hrang- Cure Parkinson’s, Birmingham Children’s Hospital leh Acorn Children’s Hospice-ah te pek a ni ang.