BLACKPINK ‘Pink Venom’-in 1B view kai

BLACKPINK ‘Pink Venom’-in 1B view kai
K-pop girl group BLACKPINK hla hit ‘Pink Venom’ music video chuan YouTube-ah vawi tluklehdingawn en a hlawh ta a, BLACKPINK music video YouTube-a vawi tluklehdingawn en hlawh thei parukna a ni.
Jennie Jisoo, Lisa leh Rose te hi tunlai khawvel hmeichhe girl group huhang nei lian ber an la ni zel a, ‘Pink Venom’ music video hi kum thum dawn kalta, August ni 19, 2022-a an tihchhuah kha niin, an studio album pahnihna ‘Born Pink’ atanga an single a ni a, a album hi September 2022-ah tlangzarhin, Billboard 200 (albums) chart-ah No.1 a kai thei a, a hla ‘Pink Venom’ pawhin Billboard Hot 100 (singles) chart-ah No.22 a kai thei bawk.
BLACKPINK music video “DDU-DU DDU-DU” leh “Kill This Love” te chuan YouTube-ah vawi tluklehdingawn hnih chuang en an hlawh ve ve tawh a, an video dang “BOOMBAYAH” pawh tluklehdingawn hnih a hnaih ve leh viau tawh a, “AS IF IT’S YOUR LAST” leh “How You Like That” ten vawi tluklehdingawn khat chuang en an hlawh ve ve tawh bawk.
BLACKPINK music video te hi a hit thei riau a, July 2018-a “DDU -DU DDU-DU” an tihchhuah pawh khan darkar 24 chhungin YouTube-ah vawi maktaduai 36.2 en a hlawh hman a, a hunlaia YouTube-a darkar 24 chhunga views ngah ber record a siam a, he music video hi K-pop group video zingah YouTube-a vawi maktaduai 100 en hlawh thei hmasa ber niin, ni 10 chhungin vawi maktaduai 100 hi a kai hman bawk.
BLACKPINK hi K-pop group zinga YouTube subscriber maktaduai 20 nei tling hmasa ber niin, an video dang “Kill This Love” chuan April 2019-a an tihchhuah khan darkar 24 chhungin vawi maktaduai 58 en a hlawh hman a, a hunlaia darkar 24 chhunga YouTube-a viwer ngah ber record a siam leh bawk.
An group hian “DEADLINE World Tour” an neih mekah North American leh an zo a, tunah hian Europe lam an hawi leh ta rih a, October-ah Asia an lut leh ang a, kumthar, January 24-25-ah Hong Kong-a Kai Tak Stadium-ah show vawi hnih neiin an tour hi an khar dawn a ni.