Blake Lively leh Ryan Reynolds ten Hurricane Helene leh Milton relief-ah $1M thawh

Blake Lively leh Ryan Reynolds te nupa chuan Hurricane Helene leh Hurricane Milton avanga chhiat tawkte chhawmdawl nan dollar maktaduai khat an thawh a, an sum thawh hi thlipui avanga chhiat tawkte chhawmdawl hna thawktu Feeding America-ah an chung lut. Feeding America-ah hian Taylor Swift pawhin dollar maktaduai 5 a lo chhung lut tawh bawk a ni.
Feeding America hi food bank network lian tak niin, eitur tlachham te hnena eitur sem thin an ni a, an pawl hian tun tum thlipuiin America a nuaiah pawh hian chhungkaw tam tak tan eitur a thlawnin an sem reng tawh a ni.
Deadpool changtupa Ryan leh Gossip Girl changtunu Blake te hian thuchhuah siamin, “He chhiatna rapthlak takin min tuam laia tanpui ngaite tana pen chhuak, a hmuna luhchilh tu mi ropui tak tak te chungah lawmthu kan sawi. He chhiatna thuah hnihin a nghawng zawng zawng te kan hre reng che u. Eng emaw kan ti ve thei a nih chuan Feeding America website -ah hian lo lut ve teh u,” tiin midang pawh che chhuak turin an sawm ve nghal bawk a ni.
Feeding America CEO Claire Babineaux pawhin X-ah thuchhuah siamin,”Hetiang hun harsaah hian Feeding America an lo support tawh thin a. Heng sum te hian chhiatnain a tuam mek mi tam takin tui thianghlim leh eitur an neih theih nan hna ropui tak a thawk ngei dawn a ni,” a ti.
Blake leh Ryan te hi midangte tan an luang chhuak fo tawh a, nikum October khan Israel leh Gaza indona kara naupang te tanpui nan sum thahnem tak an thawh taw a, 2022 khan Ukraine a indona avanga chhungkaw tlan darh te tanpui nan sum tam tham tak thawhin, 2020 khan COVID hripui do nan a maktaduai tel an lo thawh tawh bawk a ni.