BMW CE 02 India-ah tlangzarh

BMW Motorrad India chuan an electric two-wheeler CE 02 chu India-ah an tlangzarh ta a, showroom-ah Rs 4,50,000 man a ni a, India-a electric two-wheeler kan hmuh theiah chuan a manto ber a la ni. BMW Motorrad hian India-ah an all-electric model CE 04 pawh an lo tlangzarh tawh a, hei hi CE 02 an tlangzarh hma chuan India-a electric two-wheeler manto ber a ni thin. CE 02 hi Hosur, Tamil Nadu-a TVS thil siamna hmuna siam a ni.
CE 02 hi a design a simple hle a, barebone design an tih ang chi niin, body panel tlemte chauh a nei a, two-wheeler dangte nena khaikhin chuan a lang tê riau nghe nge a ni. Company lam chuan CE 02 hi e-motorbike a ni lo a, e-scooter pawh a ni chuang lo, an ti a ‘e-Parkourer’ a ni e, an ti. Single flat seat neiin, a hmalamah rectangular LED headlamp a nei a, instrument console atan 3.5-inch TFT screen neiin, reverse gear, keyless operation leh USB charging a support bawk.
A cycle part-ah chuan CE 02 hian USD fork a hmalamah neiin, a hnungah adjustable shock absorber a nei a, a ke hmaah 239 mm disc brake leh a hnungah 220mm disc brake a nei a, ABS a thuam a ni bawk. 14-inch alloy wheels neiin, a ke hmaah 120/80 section tyre leh a hnungah 150/70 section tyre a nei bawk.
BMW CE 02 hian 11 kW electric motor (15 bhp) neiin, 2 kWh battery pack pahnih neiin, a range hi km 90 niin an chhal a, a top speed chu 95 kmph a ni.