Bodo leh Adivasi intihbuainaa sipaiten flag march nei

Bodo leh Adivasi intihbuainaa sipaiten flag march nei
Mipui thinrimin mi pahnih an chil hlum avanga Bodo leh Adivasi inkara boruak tang tak awmna, Assam-a Kokrajhar district-ah chuan Indian Army-in muanna a awm theih nan flag march an nei a, inremna a awm theihna tura thutkhawm koh a ni bawk.
Nilainia thutkhawmah hian minister-te bakah Bodoland Territorial Council (BTC) chief Hagrama Mohilary pawh a tel a ni.
Thawhlehnia buaina chhuakah hian mipuiin Bodo mi pahnih an chil hlum a ni.
Army column liin boruak a tan zualna, Karigaon leh a chhehvelah sorkar thuneitute nen patrolling an nei a. Thuneitute chuan sipai, Rapid Action Force (RAF) leh Central Reserve Police Force (CRPF) mite bakah state police an la duty ngawrh hle tih an sawi.
Buaina chhuak avanga an in tlanchhiatsan mi 1,000 chuang chu sikula relief camp siam pangaah awmtir an ni a. Venhim hna thawktuten an ina an haw leh theihna turin hma an la mek.
Davos, Switzerland-a awm mek, Chief Minister Himanta Biswa Sarma chuan minister pahnih, Jayanta Malla Barua leh Charan Boro te chu Kokrajhar-ah hian mipuite kawma an dinhmun en turin a tir a. BTC Assembly Auditorium-ah Nilaini chawhnu khan thutkhawm an ko nghe nghe.
Barua-a chuan thutkhawm a kaihhruaiah hian BTC chief Mohilary leh police hotute an tel a, dan leh thupek kenkawh nana mamawhte an sawiho va. Hnam hrang hrang aiawh pawl 400 chuang aiawh an tel a, hnam leh hnam chu thawkhova muanna a awm leh theih nana hma lak tha an ti tlang niin X-ah a tar lang.
Buaina hi Thawhtanni zan dar 7.30 vela thleng niin Bodo mi, in saknaa inhlawhte chuanna chu mipuiin an ranvulh rua puhin an tiding a. An inhnial buai laiin Mahindra Scorpio tlan chuan Mansingh Road-ah Adivasi mi pahnih a su a, a chuangte chu pawt chhuakin an sawisa a, an lirthei pawh an halsak nghal nia sawi a ni.
Sawisak zinga pakhat zawk hi Thawhtanni zanah a thi a, pakhat hi Thawhlehniah a thi niin police-in an sawi.
Mi dang paliin hliam tuar bawkin Kokrajhar Medical College & Hospital-ah enkawl an ni a. Police chuan mi 19 man tawhin mi dang pawh thu zawh fiah atan an la nual bawk.
Thawhlehni khan hnam hnihte hian Karigoan bulah national highway an dang a, lirthei ke an hal a, in an kal , sorkar pisa pawh hal an tum bawk nia sawi a ni a. Hnam hnih intihbuainaah hian Karigaon Police Outpost pawh suasam niin thuneituten an sawi.
Kokrajhar district pumah hian Bharatiya Nagarik Suraksha Sanhita, 2023, Section 163 hmangin inkhuahkhirhna kalpui a ni a. Mobile internet leh data service chu Kokrajhar leh Chirang-ah la tihthih rih a ni bawk.
BTC chief Mohilary-a chuan muanna awm theih nan tute mah tharum thawha che lo turin a ngen a. Hnam hnih chu rei tak muanawm takin an lo khawsa ho tawh thin niin a sawi.