TAMIL NADU INTHLAN: NDA-ah AMMK kir, DMK-in eptu MLA lawm lut
TAMIL NADU INTHLAN: NDA-ah AMMK kir, DMK-in eptu MLA lawm lut
Tamil Nadu assembly inthlan hun a hnai zel a, politic boruak inlumlet pawh a nasa mek a. Nilaini khan thil lian thawhhona thar pahnih siam a ni.
TTV Dhinakaran-a kaihhruai, Amma Makkal Munnetra Kazhagam (AMMK) chuan Nilaini khan National Democratic Alliance (NDA) an zawm leh ta a, hetih lai hian rorel lai, DMK chuan AIADMK minister hlui, O Panneerselvam-a kaihhruai party-a an hruaitu hlun awm chhun ni mek tawh, R Vaithilingam-a an lawm lut ve bawk.
Dhinakaran-a hian NDA-a AMMK an inchhun luh leh tak thu hi puangin Tamil Nadu inthlana BJP incharge Piyush Goyal-a nen an inkawm hnuah an zawm leh tih a sawi a. Chennai-ah Goyal-a bakah L Murugan leh Nainar Nagenthran ten an thawhhona tel ve turina n lawm lut a ni.
Goyal-a chuan AMMK-in BJP kaihhruai tangrual an zawmna hunah hian an tangho chu an lungrual a, DMK thiat turin an chak tawk tih a sawi a. NDA chuan sorkar tha, vantlang hmasawnna leh hnam zia chawi sang turin hma an la dawn tih a sawi.
Dhinakaran-a kaihhruai party hi NDA-a tel thin a ni a. A chhuahsan lai hian an zinga tel, AIADMK General Secretary Edappadi K Palaniswami-a sawisel nasa tak thin a ni nghe nghe.
AMMK hian nikuma BJP-in AIADMK an thawhpui thar leh hnuah NDA hi an chhuahsan a, tuna an kir leh takah hian a hma lama dinna tur bial an inchan sem dan tur sawihona an nei hma thei dawn tihna a ni a. Prime Minister Narendra Modi-a’n Zirtawpnia an state tlawh Maduranthagam-a hun a hmannaah pawh a tel rin a ni.
Hetah hian a hmaa a sawisel nasat thin, Palaniswami-a nen pawh dawhsan pakhatah an thutho a beiseiawm a. Hei hi a thleng a nih chuan AIADMK atanga kum 2017-a a chhuah hnua a vawi khatna tur a ni ang.
Nilaini vek khan DMK chuan Thanjavur district-a Orathanadu bialtu MLA tang lai, Vaithilingam-achu an headquarters, Anna Arivalayam-ah an lawm lut a. Hetah hian Chief Minister M K Stalin leh Deputy Chief Minister Udhayanidhi Stalin-a te pawh an tel.
Vaithilungam-a hi Panneerselvam-a tana rinawm em em reng thin a ni a, AIADMK a chhuahsan tak avang hian an party-ah pawh nghawng a neih ngei rinna a lian hle a, a bikin an pawl chhung inawpnaah a thawh hlawk avangin harsatna thleng theia ngaih a ni.
Vaithilingam-a hian Palaniswami-a hnuaiah AIADMK chu ‘awmze neiin’ a kal lo niin a sawi a, ama thu a duh lutuk niin a sawi.
DMK chuan C N Annadurai-a sulhnu an la chhui reng a, anni hi Dravidian politic kal dan ang taka la kal reng niin a sawi a. AIADMK-ah kir leh turin sawm ni mah se a hnawl niin a insawi bawk.