Union Cabinet chuan thutlukna liantham tak pahnih siamin – ITBP battaliaon pasariha tihpun leh Vibrant Villages Programme (VVP) hnuaiah khua pemsan loh nan leh China ramri hnaiha tourism tihchangltun nan Rs 4,800 crore senna tur an pawm a. Hei hi China ramri hnaiha social leh security tihnghehna zel tura hmalakna a ni.
Cabinet Committee on Security (CCS) chuan Indo-Tibetan Border Police (ITBP) force chu battalion pasarihah tihpun an remti a. He mi hmang hian Arunachal Pradesh-ah sipai 8,4000 dah belh ni dawnin heng hmuna border outpost 47 te bakah staging camp sak mek 12 te an luah dawn a ni. Heng outpost siamna tur hian January 2020 khan thutlukna siam tawh niin tihian China ramri 3,488 km-ah ITBP ten outpost 176 lai an nei dawn ta a ni.
Senior government official chuan ITBP personnel te chu hmun awl luah khat turin Arunachal-ah tirh luh belh an ni ang a ti a. Hei mai bakah hian ITBP sector headquarter pawh siam a ni dawn bawk.
Union Minister for Information and Broadcasting AnuragThakur chuan battalion din belh hi border areas ah te nasa zawka chet lak ngai tia tihpun a nih thu sawiin battalion mai bakah hian kum 2025-26 ah chuan sector headquarter pawh tihpun a ni ang, a ti bawk.
“Official leh residential building sak nan, ram lei nan leh arms and ammunition atana hman turin non-recurring expediture Rs 1,808.15 crore ruahman a ni a. Recurring expenditure Rs 963.68 crore chu kum khat zelah personnel te hlawh leh ration atan pawm a ni” tiin Thakur chuan a sawi bawk a. Tihian ITBP chu tuna 88,000 atangin 97,000 ah tihpun ni dawnin Central Armed Police Force (CAPF) a lian ber palina an nih phah dawn a. ITBP hi kum 2011 khan tihpun tawh ni bawkin China ramri hnaih leh depah dah an ni.
Cabinet chuan Centrally sponsored scheme – Vibrant Villages Programme (VVP) pawh financial year 2022-23 atanga 2025-26 chhunga kalpui turin northern border a thingtlang khua te tihchangtluna a chhunga chengte tihchangkanna tura tihhmasawn nan Rs 4,800 crore lai dah a ni bawk a. Rs 2,500 crore chu kawngpui sial nana hman a ni ang a, VVP hi 2022-23 Budget khan tlangzarh tawh a ni chungin khatih lai khan concrete budget emaw concept plan emaw siam a la ni lo thung.
“He ruahmanna hmang hian border area-a cheng ten an khua an chhuahsan loh phah ang a, hmun danga an pem a titawp ang a, chu chuan ramri hnaiha security a titha dawn a ni. Hei mai bakah hian zirlai leh college kal lai te chu heng border village te tlawh tur hian fuih an ni ang,” tiin Thakur chuan a sawi bawk.
Heng scheme hmang te hian State pali leh Union territory pakhat hmar lam ramri hnaiha awma district 19 leh border block 46 te tuam a ni ang a, hmasawnna huapzo leh ramri hnaiha chengte pemchhuah loh nana hmalakna a ni. A thawhkhatnaah thingtlang khua 663 hrut phawt a ni ang a. Scheme hmang hian Ladakh, Himachal Pradesh, Uttarakhand, Sikkim leh Arunachal Pradesh a thingtlang khua 2,966 te chu huamtir tum a ni bawk.
“Scheme hmangin tualchhung behchhanin economic lama tihhmasawnna kalpui tum niin social entrepreneurship, thalaite leh hmeichhia te skill development hmaga tihchak, entrepreneurship lam tihhmasawn, tourism lama theihna tihpun, tualchhung leh traditional knowledge leh heritage te humhim leh eco-agri business lam tihhmasawna ‘hub and spoke model’ hmanga growth centre a siam tum a ni a. ‘one-village-one product’ hmanga community based organisation, cooperative leh NGO te nena thawhho tum a ni,” tiin sorkar thuchhuah chuan a tarlang.
District administration te chuan gram panchayat kaltlangin Vibrant Village Action Plan an siam ang a, heta sum mamawh 100% chu Central leh State tena an tum tur a ni bawk.
All-weathered road tha tak, tui thianghlim in tur hnianghnar, 24×7 electricity – solar leh wind energy, mobile leh internet connectivity, tourist centre, multi-purpose centre leh health anf wellness centre te din vek tur ani bawk a. Border Area Development Programme (BADP) pawh heng bakah hian a ngai ang pata heng hmunah te hian kalpui chhunzawm tur a ni bawk ang.
Cabinet chuan Ladakh eng hun pawha panna a buai loh nan Shinku La Tunnel a siam dawn bawk tiin Thakur chuan a sawi a, he tunnel 4.1 km-a sei hi December 2025-ah zawhfel hman tur niin Rs 1,681 crore sen a ni ang a ti bawk. He tunnel hian helai region tan all-round development a thlen ang a, toursi, health leh education sectr lamah hmasawnna a thlen dawn a ni a ti a. Thakur chuan he project hi strategic leh national security hawia thlir pawha pawimawh a ni a ti bawk.
Border village te tan Centre-in ruahmanna siam
Get real time updates directly on you device, subscribe now.