Boruak bawlhhlawh laka himna atana hriat tur Traffic Police hrilh

Aizawla Traffic Police-te tan chhan hrang hrang avanga sik leh sa inthlang danglam dan leh hriselna chungchangah an hriat tur tul hrilhin tunhnai khan Health & Family Welfare department chuan hun a buatsaih.
National Programme on Climate Change and Human Health state nodal officer Dr Vanlalrengpuia Chinzah chuan khawvelin a vei berte zing ami, climate change vanga harsatna thleng mek leh hriselna kawnga nghawng thui tak a neih theih dan sawiin, India ram ngeiah pawh heat-stroke vanga nunna chan mi za chuang an lo awm tawh tih a sawi.
Senior SP Traffic Stephen Lalrinawma chuan Traffic Police duty dan kalphung leh harsatna awm thei laka hma an lak thin dan a sawi a. Traffic Police-te mahni inenkawl uluk lehzual turin a chah. Hmun tam zawka chetsualna thleng thinah first responder an nih fo thin thu sawiin, khaw lum lutukin an taksa a nghawng theih dan chungchangah zirtirna pek an ni chu lawmawm a tih thu a sawi bawk.
National Health Mission lama thawktuten khaw lum avanga natna awm thei leh a inven dan an zirtir bakah Traffic Police-te tana pawimawh boruak bawlhhlawh vanga natna awm thei leh a inven dan zirtirna an ni a. Traffic Police 80 vel an tel a ni.