Botafogo an champion

Inrinni zing khan South America khawmuala football club inelna ngaiihluthlawh ber CONMEBOL Libertadores final khelh a ni a, Botafogo chuan 3-1 Atletico Mineiro hnehin a vawi khat nan an champion.
River Plate Stadium-a final khelhah Botafogo hian bul an tan chhe viau a, inkhel tan atanga minute hnihna lekah Fausto Vera lakah hlauhawm taka a chet vangin Gregore hnawhchhuah a ni nghal. Champion tura rinkai lo zawk an ni a, hma takah tlem zawk an nih bawk si vangin Botafogo dinhmun a chhe lehzual hle. Tlem zawk an nih hnuin Botafogo hian ball a chang tlem viau a, an goal venhim tumin tan an khawh nasa hle.
Tlem zawk niin, ball chang tlem viau mah se Botafogo hi goal thun hmasa zawkah an tang ta tlat thung. Minute 35-naah Luiz Henrique chuan hmahruaina goal a thun a, Atletico Mineiro a barakhaih. Tam zawk ni chunga si phur hmasa zawk an nih vangin Atletico in goal thun tumin tan an khawh nasa hle. An khingpuite nawr na viau mah se an chesual nawn leh a, goal an chhuah nawn leh. Chawlhlawk dawn hnaihah si nghak Everson chuan hmahruaina goal thuntu Henrique titluin penalty a chawi. He penalty hi Manchester United defender hlui Alex Telles chuan minute 44-naah a pet goal a, an hmahruaina ti zauin, 2-0 a hmahruai chungin chawlhlawk an hmang.
Chawlhlawk hnu lamah Atletico in goal thun ngei tumin thapui an chhuah nghal a, goal pawh an thun thuai. Second half tan atanga minute hnihna lekah Eduardo Vargas chuan goal thunin an si phurh a sut then. Vargas goal thun hian a fuih phur viau a, an si phurh sut zawh ngei tumin tan an khawh nasa hle. An khingpui ten nawr na viau mah se Botafogo an in veng thiam teh tlat thung a, an chesual duh lo. Bet zawk ni reng mah se hun tawp dawn hnaihah an vannei nawn leh. Minute 90+7-ah bench atanga lut Junior Santos chuan hnai tak atanga pet goal in an hmahruaina a tizau leh zual a. Atletico Mineiro lakah 3-1 a chakin Botafogo hi Copa Libertadores hi a vawi khat nan an champion zui ta a ni.
Copa Libertadores-ah Brazil club an chungnung chho viau a, Botafogo an champion hi Copa Libertadores-ah Brazil club an champion zawn vawi rukna chiah a ni.