Box office-ah ‘A Working Man’ a No.1
‘Snow White’-in cinema hall ticket hralhah beiseia pha lo telh telh a, a weekend vawi hnihnaah ticket hralh hi 66%-in a tlahniam nghal a, hetilai hian Jason Statham channa ‘A Working Man’ chu beisei aia chethain box office No.1 a ni. North American box office ranking hi weekend (Zirtawpni – Pathianni) chhunga US-a cinema hall ticket hralhna sum chevel atanga tehin, box office ranking hi siam thin a ni.
Dabid Ayer-a direct, Jason Statham channa ‘A Working Man’ hian tun weekend kalta khan cinema hall ticket hralhna atangin US-ah dollar maktaduai 15.2 la lutin box office No.1-ah a debut. He film hi Levon-a novel ‘Trade by Chuck Dixon’ behchhana chan niin, a script hi Ayer leh Sylvester Stallone te ziah a ni a, Jason Flemyng, Merab Ninidze, Maximilian Osinski, Cokey Falkow, Michael Pena leh David Harbour te inlan bawk.
He film-ah hian Statham chu sipai raldo thiam tak, hmalam hun êng tak nei, mahse, sipai nun chawlhsan a, mipangngai anga nun tum, construction vela hnathawk lemah changin, a hnathawhnaa an hotupa fanu, ani pawhin chhungkhat ang maia a en chu human trafficker ten an ru bo ta tlat a, zawng chhuak tura a thawh chhuahna lamah a beisei phak bak sualna inthup a haichhuah tak dan vel tarlanna a ni.
Film tlangzarh thar dang ‘The Chosen: The Last Supper (Part One)’-in dollar maktaduai 11.5 la lutin, box office No.3 a ni. Film tlangzarh thar bawk, horror movie ‘The Woman in the Yard’-in a weekend vawi linaah dollar maktaduai 9.4 la lut a, No.4 a ni ve bawk. He film hi Jaume Collet-Serra direct niin, Danielle Deadwyler channa a ni a, chhungkaw pakhat an farm a mikhual danglam tak tak an inlan chungchang vel tarlanna a ni. Film tlangzarh tho Death of a Unicorn-in dollar maktaduai 5.6 la lutin, No.5 a ni a, he horror movie hi Jenna Ortega leh Paul Rudd te channa a ni.
Box office top 10:
1 A Working Man $15,215,874
2 Disney’s Snow White $14,200,000
3 The Chosen: Last Supper — Part 1 $11,492,369
4 The Woman in the Yard $9,450,000
5 Death of a Unicorn $5,787,425
6 Princess Mononoke $4,004,482
7 Captain America: Brave New World $2,800,000
8 Black Bag $2,150,000
9 Mickey 17 $1,920,000
10 Novocaine $1,450,000
Box office-ah ‘A Working Man’ a No.1
Get real time updates directly on you device, subscribe now.