Box office-ah Avatar 2 a la No.1

Avatar 2-in India-ah record siam

James Cameron-a film siam Avatar film pahnihna ‘Avatar: The Way of Water’ chuan tun weekend kalta khan US-ah cinema hall ticket hralhna atangin dollar maktaduai 19.7 lalut lehin a kar ruk nan box office-ah a la No.1 a, hetihrual hian khawvel huapa a sum lakluh chu dollar tluklehdingawn 2 a tling ta a, cinema hall ticket hralhna atanga dollar tluklehdingawn 2 chin lalut thei parukna a ni.

-- Advertisement --

James Cameron hi film siamtu zingah cinema hall ticket hralhna atanga dollar tluklehdingawn 2 chin lalut thei film pathum nei thei awm chhun a ni a, a film siam ‘Avatar’-in dollar tluklehdingawn 2.9 a lalut thei a, ‘Titanic’-in dollar tluklehdingawn 2.19 a lalut thei bawk. Film dang dollar tluklehdingawn 2 lalut thei te chu ‘Avengers: Endgame’ (dollar tluklehdingawn 2.79), ‘Star Wars: The Force Awakens’ (Dollar tluklehdingawn 2.07) leh ‘Avengers: Infinity War’ (dollar tluklehdingawn 2.05) te an ni.

Avatar: The Way of Water hian kar ruk chhungin US-ah dollar maktaduai 598 a lalut tling tawh a, US pawnah dollar tluklehdingawn 1.426 lalut tawh bawkin, tihian a vaiin dollar tluklehdingawn 2.024 a lalut tling ta a ni. US tih lohah China chu a sum lakluh tamna niin, dollar maktaduai 230 a lalut thei bawk.

Avatar: The Way of Water sum lakluh hi tam mah se a film siam nan sum an seng hnem hle a, director James Cameron chuan nikum December-a an kawmnaah he film hian hlawk tham tur chuan dollar tluklehdingawn 2 tal a lakluh ngei ngei a ngaihthu a lo sawi tawh a ni. A film siam nan hian marketing tel miah lovin dollar maktaduai 400 chuang an seng niin an tarlang.

Avatar: The Way of Water chuan India-ah cinema hall ticket hralhna atanga cheng vaibelchhe 368.20 lalut tawhin, Hollywood movie zingah India-a sum lalut hnem ber record a siam a, a hmaa hetiang record siamtu chu cheng vaibelchhe 367 lalut thei Avangers Endgame a ni.

Avengers: Endgame hi 2019 a tlangzarh niin, Marvel Studios produce a ni a, Avangers: Infinity War chhunzawmna niin, Robert Downey Jr, Chris Evans, Mark Ruffalo, Chris Hemsworth, Scarkett Johansson leh Jeremy Renner te channa a ni a, Don Cheadle, Paul Rudd, Brie Larson, Gwyneth Paltrow leh Josh Brolin te pawh an inlan.

Avatar 2 hian India-a an tlangzarh kar khatnaah cheng vaibelchhe 182.90 lalut nghalin, kar hnihnaah cheng vaibelchhe 98.49, kar thumnaah cheng vaibelchhe 54.53, kar li-naah cheng vaibelche 21.53, kar nganaah cheng vaibelchhe 9.45, kar ruknaah cheng vaibelchhe 1.30 lalutin, a vaiin cheng vaibelchhe 368.20 a tling tawh a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More