Box office-ah ‘Fantastic Four: First Steps’ a No.1
Box office-ah ‘Fantastic Four: First Steps’ a No.1
Fantastic Four: First Steps chuan tun weekend kalta khan cinema hall ticket hralhna aTangin US-ah dollar maktaduai 118 la lutin, North American box office No.1 a ni. He film hian US pawn, ram hrang hrangin aTangin dollar maktaduai 100 la lut bawkin, opening weekend-ah khawvel huapin dollar maktaduai 218 a la lut nghal.
He film-ah hian Pedro Pascal chu scientist thluak Tha zet mai Reed Richards lemah changin, Vanessa Kirby chu Sue Storm lemah a chang a, Joseph Quinn (Johnny Storm) leh Ebon Moss-Bachrach (Ben Grimm) te nen an changho a. Reed Richards chu a nupui Sue Storm leh Johnny Storm bakah Ben Grimm te nen space expedition an neihnaah an rocket chu cosmic storm-in a nuai a, an DNA a tibuai ta a, lei (Earth)-a an kir leh hnuah superpower hrang Theuh an nei ta a. He film-ah hian khawvela an rawn kir leh hnua, khawvel tana hero an nih hnu lama thil thleng anga tarlan a ni a, Silver Surfer (Julia Garner) in khawvel a rawn tlawh a, khawvel chu Galactus avanga a chhiat tur thu a rawn thlen avangin space-ah Galactus dang tura an thawh chhuah leh dan vel tarlan a ni.
North American box office-a kar hnih No.1 ni tawh, superhero film dang, Superman-in a weekend vawi thumnaah dollar maktaduai 24.9 la lut lehin, tihian US-ah kar thum chhungin dollar maktaduai 289.5 leh US pawnah maktaduai 213.2 la lut tawhin, a vaiin dollar maktaduai 502.7 a la lut tling ta.
Jurassic World: Rebirth pawhin a weekend vawi linaah dollar maktaduai 13 la lut lehin No.3 a la ni a, he film pawh hian US-ah maktaduai 300 lalut tawhin, US pawna a lak luh nen chuan dollar maktaduai 600 a pel ve leh tawh bawk.
Brad Pitt channa ‘F1: The Movie’-in dollar maktaduai 6.2 la lut lehin, No.4 a la ni a, he film hian US-ah maktaduai 165.6 la lut tawhin, US pawna a lak luh maktaduai 344.1 nen, a vaiin dollar maktaduai 509.7 a tlin ve tawh bawk.
Box Office top 10:
1 The Fantastic Four: First Step $118,000,000
2 Superman $24,860,000
3 Jurassic World Rebirth $13,000,000
4 F1: The Movie $6,200,000
5 Smurfs $5,400,000
6 I Know What You Did Last Summer $5,100,000
7 How to Train Your Dragon $2,800,000
8 Eddington $1,664,893
9 Saiyaara $1,400,000
10 Oh, Hi! $1,115,000