Box office-ah ‘How to Train Your Dragon’ a la No.1
Box office-ah ‘How to Train Your Dragon’ a la No.1
Live-action (a tak leh a lem inchanpawlhna) movie ‘How to Train Your Dragon’ chuan tun weekend kalta khan North America cinema hall ticket hralhna atangin dollar maktaduai 37 la lut lehin a kar hnih nan North American box office No.1 a ni a, hetih rual hian an tlangzarh hmaa thawm nei lian ang reng tak ‘28 Years Later’ leh Elio’ ten beisei an pha lo a, ‘Elio’ phei hi chuan Pixar tan an opening chhe ber record a siam zui!
‘How to Train Your Dragon’ hian US-ah dollar maktaduai 160.5 la lut tawhin, US pawnah dollar maktaduai 197.7 a la lut tawh bawk a, tihian kar hnih chhungin khawvel huapin dollar maktaduai 385.2 a la lut tling ta.
Danny Boyle film siam, zombie lam film ‘28 Years Later’ chu opening weekend-a dollar maktaduai 40 vel la lut thei tura an beisei laiin, dollar maktaduai 30 chiah a la lut thei a, US pawnah dollar maktaduai 30 la lut bawkin, opening weekend-ah khawvel huapin dollar maktaduai 60 a la lut thei.
Elio ho original film niin, mipa naupang pakhat, khawvel pawn lam, vanthengreng a kal a, aliens te nena inkawm chak thin duhthusam rawn thleng ta tak tak chanchin vel tarlanna a ni a, opening weekend-ah dollar maktaduai 21 la lutin, No.3 a ni. He film hian beisei a pha lo riau a, Pixar film opening weekend a US-a sum la lut tlem ber a la ni.
Live-action movie dang Lilo & Stitch a la kal tluang viau a, dollar maktaduai 9.7 la lut lehin No.4 a la ni a, he film hian US-ah dollar maktaduai 386.7 la lut tawhin, US pawnah dollar maktaduai 523.6 a la lut tawh bawk a, a vaiin maktaduai 901.3 a tlin der tawh.
Tom Cruise film ‘Mission: Impossible – The Final Reckoning’-in dollar maktaduai 6.6 la lut lehin No.5 a la ni a, he film hian US-ah dollar maktaduai 179.4 la lut tawin, US pawna a lak luh nen chuan maktaduai 540.9a tlin ve tawh bawk.
Box office top 10:
1 How to Train Your Dragon $37,000,000
2 28 Years Later $30,000,000
3 Elio $21,000,000
4 Lilo & Stitch $9,700,000
5 Mission: Impossible—The Final Reckoning $6,550,000
6 Materialists $5,815,506
7 From the World of John Wick: Ballerina $4,535,000
8 Karate Kid: Legends $2,400,000
9 Final Destination: Bloodlines $1,885,000
10 Kuberaa $1,750,000