Elon Musk-a ‘simple life

Elon Musk-a ‘simple life’
Khawvela pahausa ber a ni a, a duh zawng apiang chu nei thei tur pawh a ni. Forbes-in a hausak zawng ni a an tarlan chu dollar tluklehdingawn 409 lawih a ni. Mahse, he pahausa hi khawvel thilah chuti takin a insengso lutuk lo tlat- khawvel mihausa dang tam tak angin in ropui leh car manto leh ei leh in tih velah a insengso ve lo tlat.
Musk hian X-ah “Ka thil neih tam zawk chu ka hralh tawh a. In pawh neih ka tum lo,” tiin a lo post tawh a, Joe Rogan podcast-ah pawh, “Kan thil neih te hian min tibuai thin. Mihring ngaihtuahna tibuai thintu pakhat a ni,” a ti bawk.
Musk hian California a a in pasarih chu dollar maktaduai 100 velin a lo tiral tawh a, in lian lo zawk, Texas-a SpaceX hmun hnaih deuha in remkhawm theih, Boxabl home, lian vak loah a khawsa ve ta naw naw zawk a, report thenkhata a landan chuan Elon Musk-a chenna hi square feet 375 vel chauh a ni a, chu chu US-a studio apartment tam zawk ai pawhin a tê zawk.
Ei leh in lamah pawh Musk hi a hautak lo khawp mai, Neil deGrasse Tyson interview-ah pawh chaw manto tak tak ei lovin, fast food vela inhnangfak mai mai a ching viau niin a sawi a, tleirawl kum 17 mi a nih laiin nikhata dollar khat chauh ei leh in senso atan hmanga khawsak a zir thu a sawi nghe nghe.
Musk chuan, “America-ah hian dam khawchhuah hi thil harsa tak a ni ran lo. Chuvangin eng tianga tlem insengsoin nge ka dam khawchhuah theih tih ka en chhin duh a ni,” a ti.
Google founder Larry Page chuan Musk hian zan riahna tur a neih loh changin a inah a riak zeuh zeuh tawh niin a sawi a. 2022 khan TED talk-ah Elon Musk chuan, “Tunah tak hian mahni pualin in pawh ka nei mumal lo, ka thiante inah ka riak kual vel a ni,” a ti nghe nghe.
Musk nena lo cheng dun ve reng tawh, Grimes chuan Vanity Fair-in an kawmnaah Musk hi a chang chuan BPL ang thawthanga a khawsak thin thu a sawi a, March 2022-ah interview-ah, “|hiana hi billionaire angin a khawsa lo. A chang chuan BPL ang maiin a awm,” a ti.
Benzinga report-a a landanin Musk hian tum khat chu McLaren F1, dollar maktaduai khat man a lei a, mahse, a thiante bula han intihtheih pui deuh a tumna lamah a chesuala, “Lo en mah teh u,” a tia, a tlan leh chu a control thei ta lo a, boruakah a kang lawpa, a su chhe ta a ni. A car lah chu insurance a lo ti lo a niawm a, siamtha leh loin a dah ta mai mai a, tunah cuan Tesla car bak a khalh ngai ta meuh lo.