Box office-ah ‘Inside Out 2’ a No.1
Pixar leh a parent company Disney tan chanchin lawmawm a awm a, an animated film tar ‘Inside Out 2’ chuan tun weekend kalta khan North America-ah cinema hall ticket hralhna atangin dollar maktaduai 155 a la lut a, box office No.1 a ni a, animated film tlangzarh tawhah chuan US-ah opening weekend-a sum la lut tam ber dawttu a ni.
‘Inside Out 2’ hi US pawnah pawh a che tha riau a dollar maktaduai 140 la lut theiin, tihian opening weekend-a khawvel huapa a lak luh chu dollar maktaduai 295 a tling thei bawk.
Animated film zinga US-a opening weekend-a sum la lut hnem ber record siamtu chu Pixar kutchhuak tho ‘Incredibles 2’ kha niin opening weekend-ah dollar maktaduai 182.7 a la lut thei a, patumna chu The Super Mario Bros. Movie niin, dollar maktaduai 146.4 a la lut thei ve thung.
Inside Out 2 hi nikum Barbie movie hnuah US-a opening weekend-a cinema hall ticket hralhna atanga dollar maktaduai 100 chin la lut leh thei hmasa ber a ni a, Barbie khan opening weekend-ah US-ah dollar maktaduai 162 a la lut thei a nih kha.
Inside Out 2 hi Kelsey Mann direct niin, a changtu a thar vek an hmang a, Amy Poehler, Maya Hawke, Kensington Tallman, Liza Lapira, Tony Hale, Lewis Black, Phylls Smith, Ayo Edebiri, Lilimar te pawh he film tana aw tawhtu zinga an tel.
Will Smith leh Martin Lawrence te channa ‘Bad Boys: Ride or Die’ pawhin a weekend vawi hnihnaah dollar maktaduai 33 la lut lehin No.1 atangin No.2-ah a tawlh a, he film pawh hian kar hnih chhungin US-ah dollar maktaduai 100 chuang la lut tawhin, khawvel huap pawhin dollar maktaduai 200 a khum ve ta bawk.
Kingdom of the Planet of the Apes pawh a la kaltluang viau a, dollar maktaduai 5.2 la lut lehin No.3 a la ni a, he film hian US-ah dollar maktaduai 157.8 la lut tawhin, US pawnah a lak luh tawh nen, a vaiin dollar maktaduai 374.5 a tlin ve ta bawk.
Box office top 10:
1 Inside Out 2 $155,000,000
2 Bad Boys: Ride or Die $33,000,000
3 Kingdom of the Planet of the Apes $5,200,000
4 The Garfield Movie $5,000,000
5 The Watchers $3,665,000
6 IF $3,450,000
7 Furiosa: A Mad Max Saga $2,425,000
8 The Fall Guy $1,500,000
9 The Strangers: Chapter 1 $760,000
10 The Lord of the Rings: The Fellowship of the Ring $632,910