Box office-ah ‘Masters of the Universe’-in ‘Scary Movie’ a ngam lo

Box office-ah ‘Masters of the Universe’-in ‘Scary Movie’ a ngam lo
Tun weekend kalta khan film tlangzarh thar panhnih inum tawk tak a awm a, tuna kum 40 ral kai tawh chin ten kan napan laia Pathianni tuk a cartoon kan en thin ‘He-Man’ film ‘Masters of the Universe’ leh ‘Scary Movie’ te an ni. Scary Movie franchise hi a hlawhtlin thei viau a, tuna a film thar hi tun kum 10 chuang mah chhunga an tihchhuah leh hmasak ber a ni.
‘Masters of the Universe’ hi an tlangzarh hma atangin a thawm ring viau a, mahse, ‘Scary Movie’ a ngam ta tlat lo. ‘Scary Movie’ hian tun weekend kalta khan North America-ah cinema hall ticket hralhna atangin dollar maktaduai 55 la lut a, box office No.1 a ni a, ‘Masters of the Universe’ hian dollar maktaduai 29.3 la lutin, No.2 a ni ve thung.
Scary Movie hi Michael Tiddes direct niin, franchise star Anna Faris leh Scary Movie parukna a ni ta. He film hian US pawnah dollar maktaduai 50.5 a la lut thei bawk a, tihian opening weekend-a a lak luh chu dollar maktaduai 105.5 a tling ta a ni.
Masters of the Universe-ah hian Nicholas Galitzine chu Prince Adam/He-Man lemah a chang a. A pianna khawvel nen an inhransan hnuah Adam chu Eternia-ah a kir leh ta a, an khawvel chu misual Skeletor (Jared Leto) lak atanga a chhan chhuah a ngai. He film-ah hian ‘80s animated character kan hmelhriat tawh atangin Teela (Camila Mendes), Duncan/Man-at-Arms (Idris Elba) leh Evil-Lyn (Alison Brie) te pawh an inlan. He film hian US pawnah dollar maktaduai 25 la lut bawkin, tihian opening weekend-a a lak lu chu dollar maktaduai 54 a ni.
Dollar maktaduai 10 senga YouTuber Kane Parson-a YouTube short flm series siam ‘Backroom’-in dollar maktaduai 25.9 la lut lehin No.3 a la ni thei a, he film hian kar thum chhungin US-ah dollar maktaduai 135 a la lut tling ta a, US pawna a lak luh nen chuan maktaduai 212 a tlin tawh bawk.
Dollar maktaduai khat pawh seng tling lo va YouTuber-in film a siam ‘Obsession’ pawhin dollar maktaduai 25.6 la lut lehin No.4 a la ni a, he film hian kar hnih chhungin US-ah dollar maktaduai 152 a la lut tling tawh a, khawvel huapin maktaduai 200 a pel tawh bawk. An sum sen te ngaihtuah chuan hlep tha veng veng tak chu an ni.
The Amazing Digital Circus: The Last Act-in dollar maktaduai 19.5 la lutin, No.5 a ni a, Star Wars: The Mandalorian and Gorgu pawhin dollar maktaduai 10 la lut lehin No.6 a la ni a, he film hian US-ah maktaduai 155.8 a la lut tling ve ta bawk. Michael Jackson biopic ‘Michael’ pawhin dollar maktaduai 7.7 la lut lehin, tihian kar sarih chhungin US-ah dollar maktaduai 354.2 a la lut tling ta a ni.
Box Office Top 10:
1 Scary Movie $55,000,000
2 Masters of the Universe $29,308,000
3 Backrooms $25,942,933
4 Obsession $25,600,000
5 Amazing Digital Circus: The Last Act $12,702,792
6 Star Wars: The Mandalorian and Grogu $10,000,000
7 Michael $7,700,000
8 The Breadwinner $3,400,000
9 Pressure $3,000,000
10 The Devil Wears Prada 2 $2,800,000