Box office-ah ‘Scream VI’ a No.1

Box office-ah ‘Scream VI’ a No.1
Scream film parukna ‘Scream VI’ chuan tun weekend kalta khan North America-ah cinema hall ticket hralhna atangin dollar maktaduai 44.5 a lalut a, North American box office No.1 a ni.
Nikum January-a Scream film pangana an tlangzarh khan opening weekend-ah dollar maktaduai 30 a lalut thei a, COVID hripui len lai a la ni bawk a che chhe hran lo. Tuna a film parukna an tlangzarh hmaa Scream film opening weekend a sum lalut hnem ber chu 2000-a an tlangzarh Scream 3 kha niin, opening weekend-ah dollar maktaduai 34.7 a lalut thei a ni.
Scream VI hian US pawn lamah pawh dollar maktaduai 22.6 lalutin, tihian opening weekend-a a lakluh zawng zawng chu dollar maktaduai 67.1 a tling. A film siam nan hian marketing tel loin dollar maktaduai 33 an seng a ni.
Scream VI-ah hian Melissa Barrera, Jasmin Savoy Brown, Mason Gooding, Jenna Ortega, Hayden Panettiere leh Courteney Cox te an chang leh a, hmelthar Dermot Mulroney, Jack Champion, Henry Czerny, Liana Liberato, Devyn Nekoda, Tony Revolori, Josh Segarra leh Samara Weaving te an inlan bawk.
‘Creed III’ chu No.2 niin, dollar maktaduai 27.2 a lalut leh a, tihian ni 10 chhungin US-ah dollar maktaduai 101.4 a lalut tling tawh. Creed III hian US pawnlamah dollar maktaduai 24 lalut bawkin, heti hian US pawna a lakluh zawng zawng dollar maktaduai 78 a tling tawh a, ni 10 chhunga a lakluh zawng zawng chu dollar maktaduai 179.4 a tling ta a ni.
Sci-fi dinosaur pic 65-in dollar maktaduai 12.3 lalutin No.3 a ni. He film hi Adam Driver channa niin, astronaut pakhat planet danglam taka tla lut, kum maktaduai 65 kaltaa kan chenna lei (earth) a awm a ni tih inhrechhuak ta chanchin vel tarlanna a ni a, amah ni lo, pakhat Mills (Ariana Greenblatt) chu a damkhawchhuah theihna tur awm chhun a ni a, dinosaur rual zingah dam khawchhuah tuma an beih dan vel tarlanna a ni. ’65’ film hi dollar maktaduai 45 senga siam a ni.
Ant-Man and the Wasp: Quantumania-in dollar maktaduai 7 lalut lehin No.4 a la ni a, he film hian kar li chhungin US-ah dollar maktaduai 198 a lalut tawh a, US pawnah dollar maktaduai 249.6 lalut tawh bawkin, a vaiin dollar maktaduai 447.6 a tlin ta.
Cocaine Bear chu top 5 khartu niin, dollar maktaduai 6.2 lalut lehin No.5 a ni a, kar thum chhungin US-ah dollar maktaduai 51.7 a lalut tling ve ta bawk.