Box office-ah ‘Smile 2’ a No.1
Horror-thriller movie an tlangzarh thar ‘Smile 2’ chuan tun weekend kalta khan North America-ah cinema all ticket hralhna atangin dollar maktaduai 23 la lutin North American box office No.1 a ni. He film hi dollar maktaduai 28 senga siam niin, Hollywood star Naomi Scott, Lukas Gage, Rosemarie DeWitt leh Miles Gutierre-Riley te channa a ni.
A film hmasa zawk ‘Smile’ pawh September 2022-a an tlangzarh kha niin, dollar maktaduai 17 lek senga siam a ni chungin, opening weekend-ah US-ah dollar maktaduai 22.6 a la lut thei a, tunah chuan khawvel huapin dollar maktaduai 217 a lalut tling tawh a, a chhunzawmna pawh hi a che chhe leh vak dawn lo niin a lang.
Smile 2-ah hian Naomi Scott chu pop star talbuai tak lemah a chang a, writer leh director chu film hmasa a mi to Parker Finn niin, thlarau sualin a luhchilh, thil tha lo tak tak tih duh tlat chanchin vel tarlanna a ni.
Box office No.1 pawh lo ni tawh ‘Wild Robot’ chu TV lamah en theih turin awm tawh mah se cinema hall lamah pawh hralh a la kal viau tho a, tun weekend kalta khan dollar maktaduai 10 la lut lehin No.2 a la ni. He film hian kar li chhungin US-ah dollar maktaduai 101.7 a la lut tling tawh a, US pawna a lak luh nen chuan dollar maktaduai 196 a tlin der tawh.
Kar liamta box office No.1 ‘Terrifier 3’-in dollar maktaduai 9 la lut lehin No.3 a la ni a, he film pawh hi dollar maktaduai 2 lek senga siam niin, ni 10 chhungin US-ah dollar maktaduai 36 a la lut der tawh. Box office No.1 pawh lo ni tawh ‘Beetlejuice Beetlejuice’-in dollar maktaduai 5 la lut lehin No.4 a la ni a, he film hian US-ah dollar maktaduai 283.9 a la lut tling tawh bawk.
Andrew Garfield lehFlorence Pugh te channa romantic drama ‘We Live in Time’-in dollar maktaduai 4.2 lalutin No.5 a ni a, he film hi state tlemteah chauh an la tlangzarh a, cinema all 985-ah chauh an la chhuah a, tun weekend lo awm turah hian a ram pum huapin an tlangzarh dawn chauh a ni.
Box office top 10:
1 Smile 2 $23,000,000
2 The Wild Robot $10,100,0004
3 Terrifier 3 $9,307,881
4 Beetlejuice Beetlejuice $5,000,000
5 We Live in Time $4,185,758
6 Joker: Folie à Deux $2,180,000
7 Piece by Piece $2,100,000
8 Transformers One $1,965,000
9 Saturday Night $1,800,000
10 The Nightmare Before Christmas $1,129,000
Box office-ah ‘Smile 2’ a No.1
Get real time updates directly on you device, subscribe now.
Prev Post