Box office-ah ‘Spider-Man’ a uai thui ber

Animated film ‘Spider-Man: Across the Spider-Verse’ chuan tun weekend kalta khan North America-a cinema hall ticket hralhna atangin dollar maktaduai 120.5 lalutin, box office No.1 a ni. He film hi beisei aiin box office-ah a che tha a, animated film tlangzarh tawh zingah opening weekend-a sum lakluh tamah pathumna a ni pha a ni.
He ‘Spider-Man’ film hi US pawn lamah pawh a che tha viau a, ram hrang hrang 57-ah dollar maktaduai 88.1 lalutin, tihian opening weekend-a a lakluh zawng zawng chu dollar maktaduai 208.6 a tling.
Spider-Man: Across the Spider-Verse hi animated film a ni nain, ticket leitu 67% chu kum 18 leh 34 inkar an ni a, superhero film dang ang bawkin ticket leituah mipa an tam zawk a, 62% chu mipa an ni. He film hi 2018-a tlangzarh animated film tho ‘Spider-Man: Into the Spider-Verse’ aiin a che tha zawk a, opening weekend-a a sum lakluh pawh a let thum dawnin a tam zawk.
‘Across the Spider-Verse’-ah hian Shameik Moore-a’n Spider-Man tan a aw a thawh leh a, Hailee Steinfeld-i’n Gwen/Spider-Woman tan a awm a thawh ve leh bawk. ‘Spider-Man: Beyond the Spider-Verse’ pawh 2024-ah an tlangzarh leh dawn a ni.
Kar kalta No.1 ‘The Little Mermaid’ chuan a kar hnihnaah dollar maktaduai 40.6 lalut lehin No.1 atangin No.2-ah a tawlh a, kar hnih chhungin US-ah dollar maktaduai 186.2 a lalut tling ta a, US pawnah dollar maktaduai 40.6 lalut belhin, tihian ni 10 chhungin khawvel huapa a lakluh chui dollar maktaduai 326.7 a tling ta a ni.
Horror movie an tlangzarh thar ‘The Boogeyman’-in dollar maktaduai 12.3 lalutin No.3 a ni a, he film hi Stephen King thawnthu ziah behchhana chan a ni a, US pawnah dollar maktaduai 7.7 a lalut a, a vaiin dollar maktaduai 20 a lalut.
‘Guardians of the Galaxy Vol.3’-in dollar maktaduai 10.2 lalut lehin No.4 a la ni a, he film hian Us-ah dollar maktaduai 322.8 a lalut tling ta a, khawvel huapin dollar maktaduai 780.1 a lalut tling tawh bawk.
‘Faxt X’ chu top 5 khartu niin, dollar maktaduai 9.24 lalut lehin No.5 a ni a, he film hian US-ah dollar maktaduai 128.5 lalut tawhin, khawvel huapin dollar maktaduai 600 a lalut tling tawh bawk.