Taylor Swift ‘Midnights’ a No.1 thar leh ta

Taylor Swift ‘Midnights’ a No.1 thar leh ta
Taylor Swift album ‘Midnights’ chu Billboard 200 (albums) chart-ah a No.1 thar leh ta a, heti hian a zawn ni kher lovin kar ruk chart-ah a No.1 tling ta. He album hi a deluxe edition chi hnih an tlangzarh thar leh a, hei hian album hralh a tikal thar leh ta a ni. Hetihrual hian Lil Durk ‘Almost Healed’ pawh top 5-ah a debut.
Billboard 200 (albums) chart hi kar khat chhunga US-a album hralh that dan atanga tehin chart ranking siam thin a ni a, album hralh zat chhut nan hian album tak tak hralh zat bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘Midnights’ hi kar khatah 2,82,000 hralh lehin hei hi chart No.3 atangin No.1-ah a invawrh kai pui leh ta a ni. Album hralh zawng zawng atanga 1,96,000 chu album tak tak hralhna niin, streaming atangin album 80,000 tlukpui (on-demand official stream maktaduai 107.6) a tling a, album-a hla mal hralhna atangin 6,000 a tling thei bawk.
‘Midnights’ hi November 2023 thla tir chart-ah a vawi khat nan a No.1 a, kar hnih a No.1 hnuah No.2-ah tawlhin, Deceember thla chawhnu lamah kar thum a No.1 leh bawk. He album hi an tlangzarh atangin kar 32 chhung chu chart top 10-ah a la awm ta char char a ni.
Midnights hi a deluxe edition ‘The Til Dawn Editiom’ an tih mai an tlangzarh thar leh a, a original album-a hla 13 bakah bonus track pasarih, Midnights (The 3am Edition a mi) bakah bonus track pathum leh ‘Snow on the Beach’ featuring Lana Del Rey leh Ice Spice nena an thawhdunna ‘Karma’ remix te a dah tel a, hei hian album hralh a tikal thar leh ta ni.
Hetia chart No.1-a Midnights a rawn kir leh hian Morgan Wallen-a album ‘One Thing at a Time’ kal tluang lai a rawn titawp ta a, he album hi 1,26,000 hralh lehin No.1 atangin No.2-ah a tawlh ta. He album hi kar 12 a No.1 hman a, country album-ah chuan he chart-a No.1 ni rei thei ber a la ni.
Lil Durk album thar ‘Almost Healed’ chu 1,25,000 hralhin No.3-ah a debut a, he chart-a top 10 kai thei album paruk a neihna a ni a, 1,22,000 chu streaming atanga album hralhna tlukpui (on-demand official stream maktaduai 167.82), album tak tak hralh zat 2,000 leh album-a hla mal hralhna atangin 1,000 a tling thei.
Chart No.1 hlui pathum-in Almost Healed hi an dawt a, SZA ‘SOS’ chu 55,000 hralh lehin No.2 atangin No.4-ah a tawlh a, Morgan Wallen ‘Dangerous: The Double Album’ chu 48,000 hralh lehin No.4 atangin No.5-ah a tawlh a, Taylor Swift ‘Lover’ chu 38,000 hralh lehin No.6-ah bawk a la awm a, Luke Combs “Gettin’ Old” chu 33,000 hralh lehin No.7-ah bawk a la awm.
Chart No.1 hlui bawk Bad Bunny ‘Un Verano Sin Ti’ chu 33,000 tling lo deuh hralh lehin No.9 atangin No.8 a kai thar leh a, Zach Bryan ‘American Heartbreak’ chu 31,000 hralh lehin No.10 atangin No.9-ah a insawn a, Bailey Zimmerman ‘Religiously. The Album.’ chu 30,000 hralh lehin No.11 atangin No.10 a kai thar ve ta bawk.
Tihian tunkar chart top 10-ah country album panga- One Thing at a Time, Dangerous, Gettin’ Old, American Heartbreak leh Religiously. The Album. te an lang a, tun kum 10 chhunga he chart top 10-a tum khata country album a lan tam ber tum a la ni