Box office-ah ‘The Equalizer 3’ a No.1
Antonie Fuqua leh Denzel Washington te direct ‘The Equalizer 3’ chuan tun weekend kalta khan North America-ah cinema hall ticket hralhna atangin dollar maktaduai 42 a lalut a, North American box office No.1 a ni a, ‘The Equalizer’ film tihchhuah tawhah opening weekend a sum lalut hnem ber a la ni a, a film hmasa berin dollar maktaduai 34.1 lalutin, a pahnihnain dollar maktaduai 36 a lalut thei bawk.
Denzel Washington-a’n a direct bakah amah a chan nghalna ‘The Equalizer 3’ hian US pawn lamah he film hian dollar maktaduai 68.5 lalut bawkin, tihian opening weekend a a lakluh zawng zawng chu dollar maktaduai 110.5 a tling ta a ni.
Greta Gerwig direct, Margot Robbie leh Ryan Reynolds channa ‘Barbie’ a la kaltluang viau a, an tlangzarh atanga weekend vawi sarihnaah dollar maktaduai 13 lalut lehin No.2 a la ni a, he film hian US-ah dollar maktaduai 600 lalut tling tawhin, US pawnah dollar maktaduai 771.5 lalut bawkin, a vaiin dollar tluklehdingawn 1.38 a tlin tawh a, kumina film tlangzarhah chuan sum lalut hnem ber a la ni.
Blue Beetle pawh a la kaltluang thawkhat a, dollar maktaduai 10 lalut lehin No.3 a la ni a, he film hian ni 10 chhungin US-ah dollar maktaduai 30.4 lalut tling tawhin, US pawna a lakluh nen chuan dollar maktaduai 100 a tlin ta.
‘Gran Turismo: Based on A True Story’-in an tlangzarh atanga weekend vawi hnihnaah dollar maktaduai 8.5 lalut lehin No.4 a ni a, ni 10 chhungin US-ah dollar maktaduai 60 lalut tling tawhin, US pawna a lakluh nen chuan dollar maktaduai 81 a tlin ve ta bawk.
‘Oppenheimer’ pawhin a weekend vawi sarihnaah dollar maktaduai 7.2 lalut lehin No.5 a la ni a, tihian US-ah dollar maktaduai 310.3 lalut tling tawhin, US pawnah dollar maktaduai 542.7 a lalut tawh a, a vaiin dollar maktaduai 853 a tlin ve ta bawk.
Box office-ah ‘The Equalizer 3’ a No.1
Get real time updates directly on you device, subscribe now.
Prev Post