Box office-ah ‘The Little Mermaid’ a lian ber

Box office-ah ‘The Little Mermaid’ a lian ber
Disney live-action movie ‘The Little Mermaid’ chuan tun weekend kalta khan North America-ah cinema hall ticket hralhna atangin dollar maktaduai 96 a lalut a, box office No.1 a ni. Memorial Day an hman avangin chawlh a rei deuh a, ni li chhungin dollar maktaduai 118 a lalut hman a ni.
US pawn lamah pawh Little Mermaid hi a che tha thawkhat a, ram hrang hrang 51 atangin dollar maktaduai 68.3 lalutin, tihian opening weekend-a khawvel huapa a lakluh chu dollar maktaduai 186.3 a tling. Hetihrual hian market lian China-ah che tha lo riau a, opening weekend-ah dollar maktaduai 2.5 chiah a lalut a ni.
He film hi North America-ah chuan hmeichhe lamin an en nasa ber a, ticket leitu 68% chu hmeichhia an ni. He film-ah hian Halle Bailey chu mermaid pakhat Ariel lemah a chang a, Ariel hian mihring, Prince Eric (Jonah Hauer-King) a ngaina tlat mai a, Prince Eric hi a hmuh theih nan tuipui chhunga dawithiam sual zet mai Ursula (Melissa McCarthy) hnenah khawmuala a chen theih nan inremsiamna tha lo zet mai a neih pui ta a, chu inremna chuan Ariel-i pa tuipui lal ram chu dinhmun derthawngah a dah ta a ni.
He film-ah hian a changtunu ber, Ariel lema chang tura mihang nula an hmang hian sawiselna a tawk ve tlat mai a, hei hian ticket hralh pawh a nghawng deuh niin Disney lam chuan an ngai deuh a ni. He film-ah hian Daveed Diggs, Awkwafina, Javier Bardem, Jacob Tremblay, Noma Dumezweni leh Art Malik te pawh an inlan.
Kar kalta box office No.1 ‘Fast X’-in nithum chhungin dollar maktaduai 22.9 lalut lehin, nili chhungin dollar maktaduai 28.5 a lalut a, heti hian ni 10 chhungin khawvel huapin dollar maktaduai 507.3 a lalut tling ta a ni.
Guardians of the Galaxy Vol.3-in ni li chhunga dollar maktaduai 25.3 lalutin, No.3 a ni bawk. Guardians of the Galaxy Vol.3 hian North America-ah dollar maktaduai 300 a lalut tling tawh a, Super Mario Bros. Movie-in dollar maktaduai 6.2 lalut lehin No.4 a la ni bawk.
Film tlangzarh thar Bert Kreischer leh Mark Hamill te channa ‘The Machine’-in dollar maktaduai 5.8 lalutin No.5 a, Robert De Niro channa ‘About My Father’-in dollar maktaduai 5.3 lalutin, No.6 a ni bawk. Film thar bawk, Afghanistan indona behchhana an chan ‘Kandahar’-in dollar maktaduai 3 lalutin, No.7 a ni bawk.