Morgan Wallen ‘One Thing at a Time’ kar 12 a No.1 ta

Morgan Wallen ‘One Thing at a Time’ kar 12 a No.1 ta
Morgan Wallen album ‘One Thing at a Time’ chu Billboard 200 (albums) chart-ah a No.1 a, he chart-ah kar 12 a No.1-na niin, tun kum 30 chhunga country album zinga he chart-a No.1 ni rei thei ber record a siam ta. A hmaa record siamtu Taylor Swift album ‘Fearless’ kha niin, Swift-in pop lama a inlehsan hma, 2008-09 chhung khan kar 11 chart-ah a No.1 thei a ni. Kum 30 hmalam lak tel chuan Billy Ray Cyrus album ‘Some Gave All’ chu he chart-a country album No.1 ni rei thei ber niin, 1992 khan kar 17 a No.1 thei a ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah, streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘One Thing at a Time’ hi US-ah kar khat chhungin 1,29,000 an hralh leh a, chung zinga 1,21,000 chu streaming atanga album hralhna tlukpui (on-demand stream maktaduai 162.52) niin, album tak tak hralh zat chu 6,000 niin, album-a hla mal hralhna atangin 2,000 a tling thei bawk.
Morgan Wallen hi a album hmasa ‘Dangerous: The Double Album’ kha chart-ah kar 10 a No.1 thei a, tunah kar 12 a No.1 leh bawk a, heti hian a album pahnih No.1 rei zawng belhkhawm chu kar 22 a tling ta a, 2020 hnulamah chuan he chart-a No.1 ni rei ber niin, amah hnaih bertu Taylor Swift chu kar 20 a No.1 tling tawh bawk a ni.
Chart No.1 hlui SZA ‘SOS’ chu 77,000 hralh lehin No.5 atangin No.2 a kai thar leh a, he album hi a CD leh vinyl an tlangzarh thar leh a, chu chuan album hralh a tikal thar leh ta deuh a ni.
Chart No.1 hlui tho, Taylor Swift ‘Midnights’ chu 58,000 hralh lehin No.2 atangin No.3-ah a tawlh a, chart No.1 hlui bawk Morgan Wallen ‘Dangerous: The Double Album’ chu 47,000 hralh lehin No.6 atangin No.4 a kai thar ve leh ta bawk.
Dave Matthews Band album thar ‘Walk Around the Moon’ chu 44,000 hralhin No.5-ah a debut a, hei hi an album chart top 10 kai thei 14-na a ni a, 2018 hnua an studio album thar ber a ni bawk. Dave Matthew Band hian 1996 khan an album ‘Crash’ chu No.2 an kaipui a, hei hi chart top 10-a an lan vawi khatna niin, heta tang chuan kum 10 bi tinah top 10 kai thei No.1 album an la nei ta ziah a ni. 1990s-ah top 10 kai thei album pathum an nei a, 2000s-ah pahnih, 2010s-ah pakhat leh 2020s-ah pakhat an nei leh tawh bawk a ni. Heti hian group zingah kum 40 chhung, kum 10 bi tina chart top 10 kai thei album nei thei ziah 11-na an ni a, AC/DC, Def Leppard, Foo Fighters, Green Day, Marilyn Manson, Megadeth, Metallica, Pearl Jam, Red Hot Chili Peppers leh U2 te huangah an lut ve ta a ni. Matthew hian solo album top 10 kai thei pathum a nei tawh bawk.
Chart No.1 hlui Taylor Swift ‘Lover’ chu 38,000 hralh lehin No.10 atangin No.6 a kai thar leh a, Swift hian Eras Tour a neih mekah he album-a hla hi a perform nual avangin album hralh a kal thar leh ta a ni.
Ghost hla panga cover project ‘Phantomie’ chu 36,000 hralhin No.7-ah a debut a, an band-in chart top 10 kai thei album pali an neihna a ni. He album-a an hla cover zingah hian Genesis (“Jesus He Knows Me”), Iron Maiden (“Phantom of the Opera”) leh Tina Turner (“We Don’t Need Another Hero [Thunderdome]”) te pawh a tel.
Luke Combs “Gettin’ Old” chu 34,000 hralh lehin No.12 atangin No.8 a kai thar leh a, chart No.1 hlui bawk Bad Bunny ‘Un Verano Sin Ti’ chu 34,000 tling lo deuh hralhin No.11 atangin No.9 a kai thar leh a, Zach Bryan ‘American Hreatbreak’ chu 32,000 hralh lehin No.15 atangin No.10-ah a kai thar ve leh ta bawk.