Box office-ah ‘Thunderbolts*’ a la No.1
Tun weekend kalta khan film tlangzarh thar boruak nei tham deuh a awm lem lo bawk a, Marvel Studios ensemble superhero movie ‘Thunderbolts*’ chu North American box office No.1 a ni a, weekend vawi hnih a No.1-na a ni ta.
Superhero rual inlanna, Florence Pugh (Yelena Belova) leh Sebastian Stan (Bucky Barnes) ten role pawimaw an channa ‘Thunderbolts*’ hian tun weekend kalta khan US-ah cinema hall ticket hralhna atangin dollar maktaduai 33.1 la lut lehin, a kar hnih nan box office No.1 a ni a, heti hian kar hnih chhungin US-ah dollar maktaduai 128.5 a la lut tling ta a, US pawna a lak luh nen chuan dollar maktaduai 272.2 a tlin der tawh.
He film hi comic book character riat lar vak loh, superhero te chang hoin, Wyatt Russell (John Walker), David Harbour (Alexei Shostakov/Red Guardian), Lewis Pullman (Bob), Hannah John-Kamen (Ghost), Olga Kurylenko (Taskmaster) leh Julia Louis-Dreyfus (CIA director Valentine Allegra de Fontaine) te pawhin role pawimawh an chang.
‘Sinners’-in a weekend vawi linaah dollar maktaduai 21.1 la lut lehin No.2 a la ni a, he film pawh hian kar li chhungin US-ah dollar maktaduai 214.9 a la lut tling tawh a, US pawna a lak luh nen chuan dollar maktaduai 283.3 a tlin tawh bawk. He supernatural vampire movie hi Michael B Jordan channa a ni.
A Minecraft Movie-in a weekend vawi ruknaah dollar maktaduai 8 la lut lehin No.3 a la ni a, he film hian US-ah kar ruk chhungin dollar maktaduai 409 a la lut tling tawh a, US pawna a lak luh nen chuan dollar maktaduai 909.6 a la lut tling ta a, video game behchhana film siamah chuan sum la lut hnem ber dawttu a ni pha tawh a, The Super Mario Bros. Movie chiah a pha lo.
‘The Accountant 2’ pawhin a weekend vawi li-naah dollar maktaduai 6.1 la lut lehin No.4 a la ni a, he film hian kar li chhungin US-ah dollar maktaduai 50.9 a la lut tling tawh.
Film tlangzarh thar ‘Clown in the Cornfield’-in opening weekend-ah dollar maktaduai 3.7 la lutin, No.5 a ni a, film tlangzarh thar dang pahnih ‘Shadow Force’ leh ‘Fight or Flight’ ten dollar maktaduai 2.01 leh dollar maktaduai 2 la lutin an dawt.
Box office Top 10:
1 Thunderbolts* $33,100,000
2 Sinners $21,100,000
3 A Minecraft Movie $7,950,000
4 The Accountant 2 $6,096,020
5 Clown in a Cornfield $3,650,000
6 Shadow Force $2,015,000
7 Fight or Flight $2,001,252
8 Until Dawn $2,000,000
9 The Amateur $1,100,000
10 The King of Kings $680,656
Box office-ah ‘Thunderbolts*’ a la No.1
Get real time updates directly on you device, subscribe now.
Next Post