Boxer 395 tel tum zingah champion tawh paruk tel

On Sep 22, 2023 22 0

Tata SK 612 LPS Pro Fight khel tura hming pekluh hun a tawp hnuah champion lai panga zinga pathumin hming an pelut a, hun tawp thlenga lehkha thehlut boxer 395 zingah champion tawh paruk an tel.
Nilaini thleng hun hawn a ni a, hun hnuhnungah welterweight champion lai C. Lalhruaitluanga leh vawinga champion ni tawh NT Lalbiakkima’n hming an pelut.
Champion lai panga zingah bantam weight lama insawn tumin fly champion Laldinsanga a tel dawn a, nikuma best boxer Ramthar Lunglei tlangval hian professional vawinga khel tawhin hnehna a chang vek a, tun tumah pawh ngaihven hlawh tur zinga mi a ni.
Bantam champion Lalrinngheta’n light title chuh a tum ve thung a, kum 21 mi Tuipui boxer hian nikum Pro Fight atangin professional a luhchilh a, vawithum inhnek tawhin a chak vek a ni.
Hruaia’n welter kalsanin middle-weight-ah chona thar hmachhawn a tum a, kum 25 mi Chawngtlai boxer hian professional-ah hnuhma tha tak neiin vawiruk a khelh tawhah chak vekin mi pathum a knockout a ni.
Champion lai zingah featherweight title kawltu Lalrosangzuala leh light champion Vanlalawmpuia’n lehkha an thehlut lo a; Rosanga hian mimal hna avangin harsatna a nei a; Awpa’n light title humhum tum mah se a rilru thlakin WBC India title chuh dan kawng a dap a, tel turin hming a pelut ta lo a ni.
Hetih lai hian champion lai mi pathum bakah champion tawh mi pathum an inlan dawn a; nikum khan New Siaha chhuanvawr Biakkima a tel lo a, tun tumah Pro Fight chanchina vawiruk champion hmasa ber nih tumin fly title a chuh dawn.
Kum 2019 middleweight champion C. Lalduhawma’n middle champion nih leh ngei a tum bawk. Nikum khan middle telh a nih loh avangin kum 26 mi Ramhlun South boxer hi a tel lo a, professional boxing a khelh tawh vawihnihah knockout-in a chak ve ve a, kumin Pro Fight-ah hian Hruaia nen an intawng thei dawn a ni.
Kum 2015 bantam champion HC Lalramfela’n weight hrang pahniha champion tumin fiahna a hmachhawn leh dawn a; nikum khan light title fight-ah Awpa a hneh lo a, kuminah bantam champion Rinngheta nen light champion nih tumin weight khatah an awm dun thei dawn a ni.
Kum kal ta khan boxer 211 an tel a, kuminah 395 inziaklutin, kar leh Thawhlehni zing dar 8 atangin LPS Huan, Falkland Vengah an hriselna endikin an inbuk dawn a, September ni 30, Inrinniah LPS Office, Zar-kawtah fixture tarchhuah tur a ni a, October ni 2-ah tan a ni ang.