Brahmaputra Board-in Tlawng lui tuihna tihpun dan tur a ngaihtuah

Brahmaputra Board-in Tlawng lui tuihna tihpun dan tur a ngaihtuah
Mizoram Irrigation and Water Resources department chuan Zirtawpni khan Aizawlah Brahmaputra Board thutkhawm a thleng a. An thu ngaihtuah zingah Aizawl leh Lunglei khawpui chawmtu Tlawng lui tui tih pun dan tur a tel.
Brahmaputra Board hi Brahmaputra leh Barak luia luanglut lui, hmarchhak states-a lui hrang hrang enkawltu, thuneihna sang tak nei a ni a. NE states hrang hrang bakah Sikkim leh West Bengal- pawh he Board-ah hian an tel.
Mizoram I&WR department hian Brahmaputra Board puihnain Springshed Management Pilot Project (100% funding) Dialdawk leh Sihphirah a lo kalpui tawh a, heng project a hi hlawhtling hle tih sawi a ni. Tunah hian Tlawng lui tuihna tipung tura hmalakna atana detail project report siam chu Brahmaputra Board hnuaiah IIT Roorkee-in a kalpui mek. Luitui lianin leilet ram tha a tihchhiat venna tur proposal thehluh ‘Anti Erosion Scheme or Flood Management Programme’ DPR pawh duan mek a ni tih sawi a ni.
Chawhnu hunah Aizawl leh Lunglei tui tlan ber Tlawng lui pawimawhna leh a lui tui tlem zel tihpun dan tur sawiho a ni a. A kaihhnawih sawrkar department leh Mizoram University, Central YMA, Save the Riparian, Centre for Environment & Social Justice, Project Save Tlawng aiawh an tel. IIT Roorkee atanga mithiam lokal bakah PHED leh I&WRD atangin paper present ngaihtlak leh sawiho a ni. Chawhnu hun hi chief minister Lalduhoma’n a hmanpui.
Board thutkhawm hi chairman Dr Ranbir Singh, IAS (Rtd) in a kaihhruai a, Ministry of Jal Shakti atangin joint secretary & financial adviser Gaurav Masaldan chuan a rawn telpui bawk. NE states hrang hranga tui leh a kaihhnawih department enkawltu secretaries ho chu Board member an nih angin an tel a. Agenda ngaihtuahho zingah Mizoram atanga project proposal pali a tel a ni.