BrahMos ‘strategic weapon’ tling ti

Supersonic cruise missile BrahMos chu tactical weapon chauh ni lo a theihna a san em avangin strategic weapon angah pawh ngaih tur, tiin Indian Air Force (IAF) Air Chief Marshal (ACM) V.R. Chaudhari chuan a sawi.
“Kum thum kaltaa northern border a thil thlen hnuah ram chhung beih a nihin ralthuam tha tak a tangkai dawn tih kan hria a. Hei vang hian Brahmos modified aircraft tam zawk kan siam a ni. Vawiinah chuan BrahMos modified aircraft chu IAF a squadron tinah a awm tawh,” tiin ACM Chaudhari chuan a sawi a.
“Sukhoi Su-30 a BrahMos kan vuah chuan kan firepower-ah theihna sang tak min pek belh a. IAF thiltihtheihna pawh a tisang chho hle a ni,” tiin a sawi bawk a.
“Kan air combat assets pawimawh ber zinga mi a nih angin brahMos supersonic missile chuan hun rei tak chhung chu precision firepower min pe dawn a ni,” tiin ACM chuan a sawi bawk a. “Tunlai khawvel hmun hrang hranga thil thleng ngaihtuahin precision, long range firepower pawimawhna te namnul theih chi a ni lo,” tiin a sawi bawk.
January 2020 khan IAF te chuan 222 ‘Tiger Sharks’ squadron Sukhoi Su-30 MKI fighter jet modified te chu lalutin hengah te hian BrahMos missile dah vek a ni a. IAF in Su-30 MKI a neih 272 zinga 40 te chu BrahMos vuah nghal tura tih a ni bawk.
Tunah chuan next generation (NG) BrahMos te chu platform tenau zawk MiG-29, Mirage 2000 leh Light Combat Aircraft (LCA) ah te vuah a nih theih nan hma kan la mek bawk, tiin ACM chuan a sawi bawk.
Tun dinhmunah BrahMos te rih lam hi 2.65 tonnes niin mahse siam that mek MrahMos-NG te chu 1.33 tonnes lek a ni dawn a. Su-30MKI te chuan tum khatah BrahMos pali an keng tel thei tura ngaih a nia, a LCA te hian tunah pahnih an keng tel thei mek bawk a. IAF te chuan air launched Brahmos chu 2.5 tonnes supersonic air-to-surface crusie missile niin 400km kap pha leh a thlawh chak zawng pawh 2.8 mach tiin an sawi bawk.
“BrahMos mai bakah upgrade mek BrahMos-NG te chu IAF in a hmanrua neih pawimawh ber ber a ni ang,” tiin ACM Chaudhari chuan a sawi bawk.
BrahMos land leh sea variant te chu a hmain hman a lo ni tawh a BrahMos original chu a tirah chuan 290km chauh kap pha a ni a. Mahse, a hnuah siam that zel niin tunah chuan 450km kap pha ni tawhin tunah 600km kap pha tura siam leh mek a ni.
BrahMos hi India leh Russia tangdun siam niin Brahmaputra leh Moskva river hming chawia phuah a ni a. Kum 2003 khan siam tan niin kum 2005 khan combat trial neih tan a ni.