Brain Tumor enkawlnaah hmasawnna thar

Tun hnaia neurosurgery leh damdawi thiamna lo changtlung zelah, thluak bawk (brain tumor) enkawlna pawh a hma aiin a himin a hlawhtling zawk tawh niin mithiamte chuan an sawi.
Thluak bawk zawng zawng hi cancer an ni vek kher lo va, enkawlna pawh a bawk dan azirin a inang lo a, a tir tea hmuh chhuah leh enkawl vat a nihin a zual zel tur a veng thei tih an sawi.
Hemi chungchangah hian, Dr. Anurag Gupta, Associate Director & Head of the Unit – Neurosurgery (Max Super Speciality Hospital, Saket) chuan, “Thluak bawk hi thluak chhunga hna thawktu cell-te pangngai lo taka an lo pun thur thur avanga lo awm a ni. Bawk dangte chu taksa peng dang cancer atanga thluaka lo darh chhawng an ni a. Thluak bawk hi a hlauhawm loh (benign) leh a hlauhawm (malignant) chi a awm a. A hlauhawm loh chi te hi muangchanga thang thin ni mah se, thluak hmun pawimawh tak tak an nek beh thin avangin harsatna lian tak an thlen thei tho,” tiin a sawi.
​ Thluak bawk lan chhuah dan (symptom) hi a lenzawng (size) leh awmna hmunah a innghat a. Luhai/lu na ngut ngut, Kaih (seizures), khaw hmuh fiah loh te, tawng fiah loh te, hriatna hloh leh mizia danglam thut te, ban leh ke zawi te, leh taksa inbuktawkna hloh te hi a lan chhuah dan a ni a. Dr. Gupta chuan hetiang symptom nei te chu ngaihthah lo va, inentir vat turin a chah a ni.
​He natna enkawlna kawngah hian zai (surgery) hi a pawimawh ber berte zinga mi a la ni a. Surgery hian natna nihna tak finfiah nan te, thluak tawt lutuk tihziawm nan te, bawk zai chhuah nan te, taksa chet phung enkawlna (therapy) dang pek hmaaa bawk lo tihhniam nan te a pui thin a. He natna zai nan hian ‘craniotomy’ (lu ruh tlem zai hawn) hi hman uar ber a ni.
​ Enkawlna hi zai chauh ni lovin, radiation therapy te, chemotherapy te, bâwk tan bika enkawlna (targeted treatments) te nen a kal kawp thin a. Damlo hrang hrangte mamawh ang zela enkawlna dik tak siamsak tur hian doctor thiam hrang hrangte tangrual (multidisciplinary team)-in hma an la thin a ni.