Brazil barakhaihtu Morocco !!

Brazil barakhaihtu Morocco !!
Nikum Qatar ram Fifa World Cup laia khawvel barakhaih tawh African team Morocco chuan Inrinni zan khan football powerhouse Brazil lakah 2-1 hnehna an chang lehpek a, an ram football chanchina world champion vawinga ni thei awmchhun South American great an hneh vawikhatna a ni nghe nghe.
Tangier khaw friendly match en turin Ibn Batouta stadium chhunga thutna awm thei zawng zawng an luahkhat hneh hle a; fans 65,000 zet pungkhawm hmaah Sofiane Boufal leh Abdelhamid Sabiri-te’n home fans sapatalna goal khat ve ve thunin, Qatar 2022 campaign an zawh hnua home game an khelh hma-sakberah hnehna chhin-chhiahtlak an chang.
World Cup semi-finalists Morocco hian tan phat atangin goal zawng nghal ngam mah se englai maha team nem tak ni ngai zen zen lo Brazil tlarhnung chu chuti maia paldarh chi an lo ni bik lo.
Friendly match mah ni se player-te an tan-ulh deuh niin a lang a, thinrimna hmel leh chetzia hmuh tur a awm lek lek thin a; tualchhung defender-te lamin an mikhualte dimlo taka an kalhtluk sek chungchangah referee lam atanga puihna duhthusam an dawn loh avangin Brazilian player-te’n na takin referee an sawisel a, chu chuan boruak a tirum zual niin a lang.
An khel rei telh telh a, Brazil lam an hriamin, ball pawh an chang tam deuh deuh a, chutih laiin Morocco-in counter-attack atangin an mikhualte an rumthaih ve deuh reng bawk.
Brazilian team-a koh a nih vawikhatnaa senior national team-a a debut nghakchhuak zui nghal Palmeiras winger Rony chuan minute 13-na lekah goal thunna hun remchang hmu mah se hnai set sawt atangin a thelh.
Minute 22-ah mualneitu team goalkeeper Yassine Bounou chuan Brazil tan goal a khilai teuh hle a, ball nun laiin a kea han thunun a tum chu a talbuai a, a chunga kan sawi Rony hian chhuhsakin, goal ruak lam hawiin a pet a, defender pakhatin lo dang hman hlauh mah se chumi ball perlet chu Vinicius-a buaipui tawk chiah ni lehin, tah hi chuan chetsual bul tantu Bounou a lo insiamrem leh hman tawh a, mualneitu team an him hram.
Minute khat a liam leh tihah thil thleng dang hmuh tur awm zui leh nghal zatin, Bounou bawk a chesual leh khut a, a tihsual zarah Vinicius chuan goal ruakah mikhual hmahruaina’n a thun ta nge nge a, mahse, VAR hmanga endik a nih hnuah goal luh dawna offside awm avangin Brazilian goal hi pawm a ni lo a, Tunisian official Sadok Selmi lakah Brazilian player-te lung a awi lo ngang mai.
Inkhel a nung leh chiah tihah South American lam chesual ve thungin, Emerson Royal chuan an lam box chhungah a ball chan lai a hloh palh a, Morocco lamin mikhual defender-in hun rangkachak a chhawpsak hi holam taka liamtir an tum hauh lo a, Bilal El Khannous siamsak atangin Sofiane Boufal chuan hnai set sawt atangin mualneitu team hmahruaina goal a tilut a, stadium chhunga Moroccan pungkhawm thawm a tha ngang mai.
Goal chhuahtute kha Brazil an ni miau a, awlsam taka tlawm duh ngai lo mikhual team hian second half minute 67-ah an siphurh sutin, hei pawh hi Morocco goalkeeper Bounou tihsual (schoolboy mistake!) leh bawk niin, na lo fahrana Casemiro pet chu a manbet zo lo a, amah atanga perchhuakin goal-ah a lut ringawt!
Minute 12 an khel tling leh tihah mualneitu team substitute Abdelhamid Sabiri chuan Brazilian box chhunga ball tlahlang la fuhin goal kham hnuai lam hrutin a chhuihlut a, he goal hi mualneitute’n an chakpui ta a ni.
Arab team zinga World Cup quarter-final lut hmasaber leh African team zinga World Cup semi-final khel thei hmasaber ni bawk Morocco hian nikum Qatar ram tournament-ah khan Africa leh Arab mipuite thinlung hnehin an mittui an lo kochhuak tawh a, an kawtkaia Brazil an hneh pawh hi mak han tih ngawih ngawih tur a awm lo mai thei.