Brazil World Cup squad-ah Neymar a tel!

Brazil World Cup squad-ah Neymar a tel!
Brazil mipuiin thin phu dep depa an thlir laiin an head coach Carlo Ancelotti chuan kumin World Cup khel tur 26-man squad a puanah tun season kal laia an ram club Santos tana match 14 chiah la khel tling Neymar Junior a telh a, tunlaia Brazil number 9 tha ber pawla mi tam takin an ngaih mek Chelsea forward Joao Pedro a hmaih chuan Mizoram thlengin sawi a hlawh viau bawk.
Kum 34 mi ni tawh Neymar hi Brazil tana goal khung hnem ber niin, match 128-ah goal 79 a khawl tling tawh a, mahse, hliamin a tlakbuak chhoh tak reng avangin kum 2023 hnu lamah Selecao tan vawi khat mah a la inlan leh ta lo a, kumin World Cup-ah pawh hian an manager-in a fit leh fit loh an ngaihchan thu a sawi a, koh zinga tel lo thut thei dinhmunah a ding hman!
Hetia Ancelotti squad-a a tel takah hian tournament tan hmain a intina hman lo turah ngai ila, US, Canada leh Mexico ramte inthlentawm tur World Cup-a a inlan thei a nih chuan he tournament-a tum li a inlanna tur a ni ve tawh ang. Kum 2014, 2018 leh 2022 tournament kha a lo khel tawh a ni.
Italian Ancelotti chuan Thawhtanni khan Rio de Janeiro khawpuia World Cup khel tur hming puan inkhawmah he veteran forward hming hi a lam chhuak a, fans thawm a tha kher mai!
Nikum maia Brazil men’s national team enkawl tura sengluh kum 66-a upa Ancelotti chuan an star player a telh chungchang sawiin, “Neymar-a dinhmun hi kum pui linglet kan zirchiang a ni hawt a; last minute thlenga a dinhmun kan enin a taksa hriselna a tha a, a la inkhel chhunzawm thei zel a ni,” tiin an thlauhthlak loh chhan a sawifiah.
Tarlan tawh angin, tel tura beisei zinga squad chang pha lo langsar ber leh mi tam tak mak tih hlawh chu tun season Premier League-a goal 15 thuna Chelsea top scorer ni thei forward Joao Pedro a ni.
Blues striker tha hian goal a thun theih piahlamah a thiante tan pawh a tangkai tih a hriatna chu league-ah assist ngawt pawh tum nga a siam chhuak tling a, heti chunga hnawl a ni hi ngaithiam lo an tam mai a; Mizorama Chelsea tantute pawhin social media platform hrang hrangah Pedro vuipuina thu leh hla an tarchhuak chiai chuai!
He ram atanga kumin Fifa tournament lian khel lo tur langsar dangte chu Real Madrid striker Rodrygo, defender Eder Militao leh Chelsea winger Estevao-te niin, anniho hi chu hliam vanga koh rem lo an ni.
Blues midfielder Andrey Santos erawh hliam vang ni chuang loin a hmaih leh chiah bawk a, Italian coach Ancelotti hian a club hlui pakhat Chelsea hi a haw hrim hrim emaw ni ti pawl an awm hial a ni!
Brazil squad-ah hian La Liga star lam atangin Vinicius Junior of Real Madrid leh Barcelona hmatawng langsar Raphinha bakah Real-in loan-a Lyon lama an thawnbo mek rawlthar striker kum 19 mi lek Endrick-te an tel.
Hliam avanga Liverpool game hnuhnung 10 khel thei tawh lo goalkeeper Alisson Becker pawh koh zingah a tel zui ta tho a; Manchester United pair Casemiro leh Matheus Cunha, Newcastle midfielder Bruno Guimaraes, Arsenal defender Gabriel, Brentford striker Igor Thiago leh Bournemouth forward Rayan-te pawhin World Cup khel tur squad-ah hmun an chang.
World champion tum nga ni tawh awmchhun Brazil hian June ni 13 khian Morocco an tum hmasa ber ang a; Haiti (June 20) an khelh atanga a ni linaah Scotland nen an Group C game hnuhnungber an khel zui leh ang.
Tarlan tawh thin angin, team 48 ngawt chhuak thei tura tel thei zat an tihpun tak chiam kumin World Cup hi June ni 11 atanga khelh tan tum a ni a; TV lama chhuah chhawn man hi Fifa lamin an chhiar to uchuak ve bawk avangin India leh Asia khawmualpuia ram lian dang China atangin chhuah phalna lei an la awm lo tun thlengin!

Brazil squad:

Goalkeepers: Alisson (Liverpool), Ederson (Fenerbahçe), Weverton (Gremio)

Defenders: Alex Sandro (Flamengo), Bremer (Juventus), Danilo (Flamengo), Douglas Santos (Zenit), Gabriel Magalhaes (Arsenal), Ibanez (Al Ahli), Leo Pereira (Flamengo), Marquinhos (PSG), Wesley (Roma)

Midfielders: Bruno Guimaraes (Newcastle), Casemiro (Manchester United), Danilo Santos (Botafogo), Fabinho (Al Ittihad), Lucas Paqueta (Flamengo)

Forwards: Endrick (Lyon), Gabriel Martinelli (Arsenal), Igor Thiago (Brentford), Luiz Henrique (Zenit), Matheus Cunha (Manchester United), Neymar (Santos), Raphinha (Barcelona), Rayan (Bournemouth), Vinicius Jr (Real Madrid).