Brentford in hma lam an pan

March 6, Thawhtan zan khan English Premier League-ah inkhel pakhat a awm a. Brentford chuan Gtech Community Stadium-a an mikhual Fulham chu 3-2 in an lo hneh a. European competition hmahchawn phak beiseina sang zawk nei turin point thum hlu tak an hmu. Brentford lakah tlawm bawk mahse Fulham pawhin European competion hmachhawn phak tumin tan an khawh zui zel bawk.
Season kal mekah beisei phak baka che tha Brentford hian Gtech Community Stadium-a an mikhual Fulham lakah bul an tan tha viau a. Inkhel tan atanga minute rukna lekah hmahruaina goal an thun nghal. |ha taka an khingpuite nawr tlang a, goal thun theihna hun tha zet mai an hlah hnu lawkah corner an hlawhchhuak a. Corner atanga ball kal zel chu Ethan Pinnock chuan kawng zetin a pet a. Fulham player Tim Reamah chuan an lamah a dang pial lut a, mualneitu lamin goal an thun ta nge nge.
|ha taka bul tanin, an mikhual lakah goal thun hma viau mah se Brentford in goal dang an thun belh thei lawk lo thung. Mikhual team Fulham hian minute 39-naah free-kick an hmu. Andreas Pereira chuan tha zetin free kick a chhuih a. Goal ngei tura ngaih a nih laiin goal kham a per dawp thung. Ball per let leh hi vengtu nei lo Manor Solomon chuan awlsam takin a tauh goal a, an si phurh a sut. Pinnock leh Solomon te goal thun bak hi chawlhlawk hmain goal dang a luh belh thei lova, 1-1 a inhnehtawk chungin chawlhlawk an hmang.
Chawlhlawk hnu lamah mualneitu Brentford an khel tha zui leh viau a, goal pawh an thun leh thuai. Minute na taka ball an vawm chu an khingpuiten an petchhuak thei mai lova, box chhunga buai deuh nak nak karah Issa Diop chuan Christian Norgaard a titlu a, penalty a chawi. He penalty hi Ivan Toney chuan chiang zetin a pet goal a, hma an hruai nawn lehna goal a thun. Ivan Toney hian Brentford tan penalty vawi 22 petin a la pet goal vek a, record a nei tha hle. Season kal mekah beisei phak baka an chet thatna kawngah Toney hian a thawhhlawk viau a, inelna hrang hrangah vawi 24 inlanin, goal 16 a thun tling tawh.
An mikhual lakah hma an hruai nawn leh hnuin Brentford hi inrintawk takin an inlan zui a, goal hnih an thun belh zui leh ta hial bawk. Hun tawp dawn hnaihah fuh zeta an khingpuite an nawr tlang hnuin Mathias Jensen chuan Schade siamsak tha tak chu minute 85-nah awlsam takin a pet goal a. Near post angle chep tak kara a pet goal hmangin an hmahruaina a tizau a, an chakna a nem ngheta ngaih a ni.
Mimualah si hnih ngawtin hnufual tawh mah se Fulham an hnual mai lova, goal thun ngei tumin tan an khawh zui zel a, an thawhrim rah sengin goal an thun belh leh ta nge nge. Hun pek belh tawp dawn hnaih lam minute 90’+9-ah an si phurh an sut then. Hla tak atanga shot tha tak chu si nghak Berd Leno chuan dang bawk mahse ball per let leh chu Alves Morais chuan awlsam takin a pet goal a, an si phurh a sut then. An si phurh sut zova, point hmuh theih beiseina nei bawk mahse hun a tawp a, London derby-ah Fulham chu Brentford lakah an tlawm zui ta a ni.
Thawhtan zan London derby-a inhmachhawn Brentford leh Fulham te hi season kal mekah an che tha dun viau. Gtech Community Stadium-ah chak a, point thum hmu Brentford hian vawi 24 khel tawhin, point 38 an hmu mek a. Pakuana daihah la awm bawk mah se paruknaa awm mek Newcastle United nen an inkarah point thum chiah a tla zep a. European Competition khelh phak beiseina sang zawk an nei thar a, phur takin hma lam an pan ang.
Tarlan tawh angin Fulham hi season kal mekah an chetha viau a. EPL-ah vawi 26 khelin point 39 an hmu mek a, pasarihnaah an awm mek. Vawikhat chaka top 6 huang luah thei dinhmunah an ding. An chunga awm hnai vai pahnih Newcastle United leh Liverpool aiin Fulham hian an khel tam zawk mek thung a, hei hi an dinhmun that tawk loh chhan a tling bawk. Brentford laka an tlawm hnu lawkah khingpui hautak an neih zawn a ngai dawn. Kartawp hian hmahruaitu Arsenal an hmachhawn zui a ngai dawn a. Gunners lakah point hmu turin an thawhrim hle a ngai dawn a. Arsenal an hmachhawn hnu hian FA Cup-ah Manchester United an tum zui leh ang.