Britain Prime Minister tur Keir Starmer

“Labour ka thlak danglam a. In tan beiin Britain ka thlak danglam ang” tiin Keir Starmer, chief of the Labour party chuan May 28 khan UK election July 4 atana campaign a neih kal zelah X ah a post a.
Inthlan result chhuak chuan Britain in inthlakdanglama duhzia chiang takin a pholang a. Starmer kaihhruai Labour party chuan mipui te mandate hmuin hneh takin chakna an chang a. UK House of Common ah Labour te chuan seat 650 awmah 410 lai an chang tura ngaih a ni.
Hetiang taka Labour tena chakna an channa chhan hi Starmer an Labour party a reform vanga ngaiha ni. Starmer hi kum 2015 khan MP ni tanin, leftist jeremy Corbyn an kum 2019 inthlan hnua Labour leadership atanga a ban hnnuah Labour hotu a ni zui ta a ni.
Labour party hruaitu nih inchhuhnaah agenda pawimawh bik 10 neiin chung te chu socialism moral case behchhan tiin a sawi a. A agenda neih zingah mi hausa tawntawte atanga tax lak 5% a tihpun te, UK arms sales khuahkhirh te, rail, mail, energy leh water sector nationalising te, Green deal thar siam te, worker rights tih chauk te a tel a. Party party leader atana thlana nih hnuah heng a thutiam tamzawk te hi a kalpui zui lo thung.
Starmer chuan Brexit, COVID pandemic, Russia-Ukraine war leh Tory sorkar policy chhe tak chuan Briatin economic progress a tichhe vek a ti a. Tuna mamawh pawimawh ber chu economic leh financial stability a ni tia sawiin chu chu Labour election manifesto ah pawh a langsar ber lai a ni.
Manifesto an neihah chuan Labour te chuan railways chauh nationalise an aupui thung a. Hun a danglam leh tawh tiin UK mihausa tawntaw te a chhiah sangbik lakbelh pawh an hnuchhawn bawk a, a chhan ber pawh World War II hnuah UK chuan tax burden sang ber a neih mek vang a ni a. Chubakah Starmer chuan kum 2022 a promise a siam $28 billion climate investment pawh an kalpui rih dawn lo bawk.
Chutihrual chuan Labour chhunga left-wing candidate te nawrliam zelah puh a ni thung a. Chu chu tuna inthlanna neihah candidate an siamah pholanin a awm tia sawi a ni a. Leftwing MP nilai te chu hnawl niin UK a Black woman MP hmasa ber Diane Abbott chuan Labour te chuan leftwinger te nuaibo an kalpui mek tiin a sawi nghe nghe.
Leftwing MP te nen Israel in Gaza a indona a kalpui mekah an ngaihdan a in ang lo va. Starmer chuan Israel chuan ‘mahni inhumhim turin dikna a nei’ tih ngaihdan neiin Israel a thlawp tlat a.

-- Advertisement --

Idealist atangin realist
Starmer hi kum 1962 khan working class family a piang a ni a. A chawrchhuahna chu working people leh trade union te harsatna tawh hrethiam tak a nihna a nih thu a sawi thin. Rethei taka seilian niin unau pali an ni a, a nu damlo reng a ni bawk. A pa chu Surrey khuaah toolmaker ni thina ni a. School a zawh hnuah law zirin an chhungkuaa college graduate hmasa ber a ni bawk.
Human rights lawyer a nihnaah Starmer record chuan progressive leh conservative faction atangin fak leh sel a hlawhphah bawk a.
A law practice naah human rights chu a lailumah a dah tlat bawk a. Caribbean ramah te kalin thi tura an chungthu rel te tana dingin hma a la thin. McLibel case tih lar tak mai McDonalds tena an company in environment an tichhia tia environmentalist pahnih an khinnaah pawh a environmentalist te tan a ding a ni.
Kum 2003 khan ‘realist’ lam a awn tan a, khatihlai khan Nothern Irelanf a Policing Board tena human rights adviser atana an ruat atangin a ni. Kum 2008 atanga 2013 thleng khan Director of Public Prosecutions and Head of the Crown Prosecution Service (CPS) hna thawkin hei hi politics a tuina bul tiin a sawi.
Mi thenkhatte erawh chuan Starmer chuan ideology a nei lo an ti ve thung a. |henkhatte chuan Labour party siamthat a tumna lama a ideology kalpui kawngah Tony Blair nen an khaikhin thung.
Mahse Tony Blair ang lo takin Starmer chuan party chu workers leh trade union te harsatna ngai pawimawh leh chinfel lama hmala tur te, public industries te nationalisation te leh sumdawnna lama sum tam zawk a luh theih nana hmalak te a tel.
Labour tena “New Deal for Working People” an tihah chuan worker basic rights heng sick pay, parental leave leh unfair dismmissal laka humhimna pek te kalpui a tel a. Market ‘free rein’ pek duh lovin mahse ecobnomic growth awm theih nan policy hmanga hmalak a duh thung a. Climate justice duhbawkin green industry din a duh bawk.
Britain chu a economy a thang lo rih hle a, a health system a tlabal hle bawk a, public service tlachhia in national debt sang tak a neih karah Starmer hian parliamentary majority nei mahse danglamna a siam tak tak ang em tih chu hunin a hril tur a ni a. Mahse, Britsih mipui te chuan chiang takin Starmer chu an duh tih a chiang hle.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More