British MotoGP-a chak filawr Fernandez
Pathianni khan Silverstone tlankawngah British MotoGP kan thlirliam a, Trackhouse Racing rider Raul Fernandez chuan opening lap atanga a hmahruaina thlah tawh loin championship hmahruaitu Jorge Martin hial a thlen khalh a, nikum Australian Grand Prix hnu lama a vawi khatna atan Moto GP lawmman semna dawhsan chung ber a luah leh thei ta a ni.
Kum 25-a upa Fernandez hi Inrinni sprint-ah chesualin tlanchhuak zo lo mah se Pathianni intlansiak tak takah a career-a a vawi hnihna atan MotoGP hnehna a sualchhuak zui ta tho a ni.
Aprilia rider Martin khan pole chang bawk mah se Turn One lekah khawl lam buai avangin a hmahruaina a hloh a, palina daihah chhuk phahin, tah hian rei erawh a cham zui duh ta chuang lo a, tlan fuh em em Fernandez pha lo deuh chauhin pahnihna dinhmun a hauh zui ta tho a ni.
Kum 25 mi ve bawk Jorge Martin khan British MotoGP hnehna tluantling chang zo ta lo mah se sprint race-a a chak ber tel leh bawk avangin championship-a a hmahruaina chu a sawhnghet belh leh det tho a, amah hnaihbertu leh a team-mate ni bawk Marco Bezzecchi lakah point 31-in a sang.
Italian rider Bezzecchi khan lawmman semna dawhsan hniam ber luah chungin championship table-ah pahnihna a kai chho a; season kal laia a tumkhatna’na tlanchhuak zo lo Trackhouse rider Ai Ogura chu pathumnaah a chhuk ve thung.
Defending champion Marc Marquez pawh point hmu pha zawnga thlengin pasarihna a ni a, drivers’ standing-ah palina a luah ve ta bawk!
Pathianni race-ah khan Japanese Ogura bakah chetsual avanga a tawp tlan thleng zo lo rider dang paruk lai awmin, chu’ng zingah chuan first lap leka intitlu Alex Rins leh Joan Mir an tel.
Tlanchhuak zo lo ve ta lo dangte chu Enea Bastianini, Iker Lecuona, Cal Crutchlow leh Francesco Bagnaia-te an ni.
Tunkar tir mai khan MotoGP chuan thuchhuah siamin, Silverstone tlankawnga tlan mi British Grand Prix contract neih lai an pawhsei thu leh a lo berah kum 2028 thleng he race hi calendar-a a chuan zui tur thu an nemnghet.
Kum kal laia race kan thlir leh tur hi August ni 30 khian Spain lama Aragon Grand Prix a ni ang.