British player manto ber Rogers

London club lian Chelsea chuan Aston Villa leh England midfielder Morgan Rogers chu British player manto ber ni turin an la lut a, kum ruk daih contract an ziahpui.
World Cup 2026-ah England tan khela USA lama zin Rogers hi thawhtanni khan England-ah a kir a. Chelsea zawm fel turin medical test a hmachhawn zui nghal a, thawhlehni khan an inla lut zui nghal. Chelsea chuan Rogers manah hian £117m an seng a, hei hi Bristish a player leina manto ber a ni.
Chelsea manager thar Xabi Alonso chuan season thara chetha turin squad thuamchak hna a thawk mek. Aston Villa atanga an lak fel thei Morgan Rogers hi hun rei ata lak tuma an lo ngaihven tawh a ni a, lak theihna hun remchang tha zawk an neih an bawhpelh duh lova, sum tam tak sengin an la lut zui nghal.
Arsenal pawhin Rogers hi an awt hle a, nipui bazar inhawng meka lak an tum ber atan an dah hial. An squad thuam chak turin awt viau mah se Aston Villa in an chhiarna zat erawh to an ti a, tlawm zawka lak dan kawng an dap. Man tlawm zawka lak an tum laiin Chelsea an rawn lang thut a, Villa in an chhiarna zata an lak ngam bawk si vangin an indawr fel ta thuai reng a ni.
Morgan Rogers an lak theih tak lohah chuan Arsenal hian player dang lak tur an zawng a, Paris St-Germain winger Bradley Barcola leh Bournemouth player Junior Kroupi te lak an tum dawn niin tarlan a ni.
Blues hian £117m senga Rogers an lak fel tawh bakah hian £47m sengin full-back Marco Palestra chu Atalanta atangin an la fel tawh a. Rayo Vallecano atangin defenders Pep Chavarria lak an tum mek a, France defender Maxence Lacroix chu Crystal Palace atangin lak an tum mek bawk. Lak an tum zingah hian Argentina rawlthar midfielder Valentin Barco pawh a tel niin tarlan a ni.
Chelsea midfielder thar thar Morgan Rogers hian season liam ta khan Aston Villa tan inelna hrang hrangah vawi 55 khelin goal 12 a thun a, assist vawi 12 ngawt a nei tling bawk. Aston Villa tan a chet that vangin World Cup-ah England tan khel turin koh a ni hial nghe nghe. World Cup-ah pawh a chetha thawkhat viau a, hei vang hian Chelsea tan khel turin inrintawkna sang zawk a neih ngei a rinawm.
Rogers hian London-a club lian ber a zawm thei chu lawmawm a tih thu a sawi a. Theihtawp chhuah a, chetthatpui ngei a tum thu a sawi.