Mizoram kawngpui engemawzat enkawltu Border Roads Organisation chuan kawngpui tih tlo na atan a luannaah thildang bakah plastic chhia sawngbawl an hmang tan.
-- Advertisement --
Project Pushpak hnuaia ramri hrul kawngpui enkawlna leh kawngpui thar siam hna thawktu Border Roads Organisation (BRO) hotute chu Thawhtanni khan Mizoram larsap Hari Babu Kambhampati chuan Raj Bhavan-ah a kawm a. BRO hotute report danin, kawngpui thar km 588.08 siam hna an thawk mek a; kawngpui awmsa km. 307.70 enkawl hna pawh tun atanga reiloteah an kutah a awm dawn. Hmun 22-a lei an dawh zinga 17 chu an thawk mek a, 2 an la tan lo a, 3 an zo tawh.
Mizorama kawngpui siamnaa an harsatna tawh ber chu hmanraw tha hmuh tur a vang thin a, kawngpui a tlo lo thin tih an sawi. He harsatna sukiang tur hian hmanraw thenkhat, tunlai thiamna hmangin an hmang mek tih an sawi. BRO report danin, cementitious base & cementitious sub base, geo textile, biological enzymes and biaxial geogrid bakah plastic chhiate kawngpui chunglang leh a chhunglam tih tlo nan an hmang tan.
Larsap chuan Mizoram hmun kilkhawr zawkah inkalpawhna tha a awm theihna’n BRO-in hna ropui tak a thawk tih a sawi a. Kawngpui chhawr tangkaitu chu mipui an nih rualin ram venhimna kawnga thawktu sipaite tan pawh a tangkai dawn hle a ti. Mizoramah hnathawh hun chhung a rei lo tih hre chunga chak taka hna an thawh thin avangin fakawm a tih thu a sawi.
BRO chuan an project khawihah pawnlam atanga harsatna an tawk chungin, hna an thawk chak thawkhat nia a hriat thu a sawi a. Tun aia tan an lak lehzual chuan kawng siamtu agency thenkhat leh contractor te entawn tur khawpa theihna neiah a ngai tih a sawi.
“Mizoramah hnathawh hun chhung a reilo tih hi tlang hriat a ni a. Hnathawh hun chhung reilo leh harsatna awm thei zawng zawng hi project siam dawnah sawifiah a, bilh tel vek a ni. Heng zawng zawng chhutlawk sa vek hian project thawh zawh hun tur hi siam thin a ni,” Hari Babu Kambhampati hian a ti a. Mizoramah chuan project-te kum 2 atanga kum 3 thawh zawh tura siam chu kum 5/6 leh a aia reiahte zawh a ni fo thin tih sawiin, “Hei hian project thar awm tur a dan bakah mipuiin an chhawr tangkai hun tur aia tlaiah an chhawr phah fo a, thil fello tak a ni. Hmasawnna ruhrel dintute hian mawhphurhna pawimawh tak an neih an hriatchian a, an hnathawh turte a hun taka thawh zawh dan kawng an hmuhchhuah a ngai a ni,” a ti.
BRO-te chu kawngpui siam hna an thawh kawngah tunlai thiamna thar hman tangkai tum turin a chah a. Sarang leh plastic bawlhlawhte pawh tangkai taka kawng siamna hmanruaa hman dan dap turin a fuih.
Hnathial leh Sangau inkara Darzo lei chu lirthei rit zawk kal theiha siam a pawimawh tih larsap hian a sawi a. BRO hotute chhan danin, lei dawhna tur DPR pawm niin tender chhuah a ni tawh a, lei siam tan thuai an inbeisei a, kum 2/3 hnu ah zawh an inbeisei.