Kum tam tak chhung buaina awm tawh Mizoram electoral roll atanga Tripura-a Bru voter-te sawn an nih dana Mizoram chief minister leh sawrkar hmalakna an chhuangin lawmawm an tih thu MNF Thalai chuan an sawi.
MNF Thalai Hqrs hruaitute chu Thawhlehni khan Election office-ah lengin, Tripura-a khawsa Bru-te Mizoram electoral roll atanga paih an nih tawh dan an zawtfiah a, hmalakna chak zawka kalpui theih dan a awm em tih an sawipui.
Chief minister Pu Zoramthanga kaihhruai MNF sawrkar leh tlawmngai pawl hrang hrang tanrualna avangin Tripura-a khawsa Bru-te chu Union Home minister Amit Shah kaihhruaina hnuaiah mi 30000 chuang Tripura hmuna awm nghet turin 2020 January 16 khan New Delhi-ah inremna thuthlung ziah a lo ni tawh a. Hemi tum hian Mizoram chief minister bakah khatih laia Tripura chief minister Biplab Kumar Deb leh Bru pawl hrang hrang aiawhte chuan inremna siamin, 2019 November 30 hnulama Tripura Relief Camp-a Bru la awm mekte chu an duhthlanna in Tripura state-a an chen hlen an lo remti tawh tih MNF Thalai hian an sawi.
He hmalakna kal zelah hian Tripura state-a inbengbel tawh, Mizoram electoral roll-a hming la chuang Bru voter 11658 chu Election Commission of India kaihhruaina in Mizoram electoral roll atanga paih tura hma lak a ni a. Heng atang hian mi 4339 chu Mizoram electoral roll atanga paih an ni tawh a. Tripura-a inbengbel tawh Mizoram e-roll atanga paih hmabak hi voters 7319 an ni tih a sawi bawk.
‘Hun rei tak chhung Mizoramin a lo buaipui tawh, Tripura transit camp 6-a awm Bru-te Union Home ministry hriatpuina leh remtihna thlapa Mizoram sawrkar leh Tripura sawrkar bakah Bru pawl hrang hrangte remtih tlannaa chinfel a ni chho ta hi lawmawm kan ti a. Mizoram leh hnam tana hriatreng tur hmasawnna hrang hrang min siamsaktu chief minister Pu Zoramthanga leh a kaihhruai Mizoram sawrkar chungah lawmthu kan sawi a ni,’ thuchhuah hian a ti.