Bryan Adams “(Everything I Do) I Do It For You” MV-in 1B view a kai

Bryan Adams te lar vanglaiin YouTube kan la hmelhriat lo, an vanglaiin hetiangin internet te hi mipuiin kan duhthalin hmang theiin, social media te lo hmelhriat tawh ila chuan an music video te hian tluklehdingawn en hi a hlawh daih tawh ngei ang. Tunah, rimawi kawvela a hming pawh kan lam chhuah ngai tawh meuh loh hnuah Bryan Adams chuan YouTube-a music video vawi tluklehdingawn en hlawh thei a neih belh ve leh ta.
A hla hit, a vanglaia keini ramah pawh thalai zawng zawngin kan sakpui theih tur khawpa kan hriat lar “(Everything I Do) I Do It For You” music video chuan YouTube-ah vawi tluklehdingawn en a hlawh ve ta a, he mellung kai thei music video pahnih a neihna a ni a, a hla dang 1993 hla hit “Please Forgive Me” music video-in 1B view hi a lo kai tawh bawk a ni.
“I Do It For You” hi 1991-a Kevin Costner channa “Robin Hood: Prince of Thieves” soundtrack kha niin, an tihchhuah atangin rimawi khawvel a tuam nghal hlup hlup a ni deuh ber a, a film a hit bawk nen, an inchhem alh tha hle a ni. He hla hi Billboard Hot 100 (US singles) chart-ah No.1 kaiin, kar sarih chhung a No.1 thei a, Bryan Adams hla he chart-a No.1 kai thei hla pali zinga No.1 ni rei thei ber a ni nghe nghe.
He hla hi Bryan Adams album “Waking Up the Neighbours”-ah a dah telin, a album pawh hi Billboard 200 chart-ah No.6 a kai a.
“I Do It For You” soundtrack-a an hmanna “Robin Hood: Prince of Thieves” pawh hi a hit hle a, 1991 khan cinema hall ticket hralhna atangin dollar maktaduai 390 la lut theiin, hemi kum film tlangzarh zinga sum la lut tam ber dawttu a ni thei bawk a ni.