BSF-in raltlante thuam leh Bible man

Bangladesh-a Chittagong Hill Tracts atangin Mizoramah mi 500 vel an raltlan a, tun hnaiah BSF te’n raltlante thuam hrang hrang an man; Bible leh hla bu thlengin.
Thu dawn danin, ratlan, Mizorama lutte zinga engemaw zat chu BSF te hela a ruka Mizoram khuaa lut an ni a, khua an luh dawnah BSF thawm an hriat avangin an thuam leh hmanruate keng ngam lovin an thukru a, a rukin khua an lut thin. Chutianga an thil thuhrukte chu tun hnaiah BSF te hian hmuin an man nual.
Chawlhni pawh khan Parva III khaw daiah raltlante thuruk thawmhnaw, chem, hla bu leh Bible te hmuin BSF te hian an man a, a hmain chutianga man chu a lo awm nual tawh bawk.
“Raltlante hian BSF patrolling an awm tih an hria a, an thawm an hria a, raltlan an ni tih an hriat an hlau a, an thil kente an thuruk thin a,” Parva III pa pakhat chuan a ti.
BSF te hian raltlante hi Mizorama an luh an remti lo a, ramri velah lo dan tumin ngawrh takin an duty mek. Chuti chung chuan raltlan 100 chuang chu a rukin Mizoramah an lut tawh a, hetianga BSF an duty hma hian raltlan za tel an lo lut hman bawk.
Lawngtlai District-a Parva III hi raltlante pan ber khua a ni a, chuta tang chuan sorkarin khaw dangah a sem darh leh thin. Parva III-ah pawh hian BSF hi ngawrh takin an duty a, khaw daiah inzarpharhin hmun riat velah an awm mek.
Parva III YMA president Lalsangpuia chuan BSF te hi mipui lakah an sual lo a, mahse ni tin khawsak a nghawng tih a sawi. “Ramah kal dawn ila, kan kalna tur zawng zawng hriat an tum a, kan chetna te chhinchhiah vek an tum a, a hma phei chuan feh tur pawhin Aadhar ken a ngai a. |awng kan thiam si lo a, a ninawm khawp mai,” a ti.
“Hmeichhe tan a buaithlak zual a, dai hnaiah thing phur dawn se, chawhmeh la dawn se, an lo endika an chhinchhiah zel a ngai a. Mipa hi chuan kan ti nawk nawk thei mai a, hmeichhia an khawngaihthlak a ni,” a ti bawk.
Zan lama an chhuak thei lovin a nghawng thu a sawi a, chakai meichher chhit tur te, chengkawl khawrh tur tein zan lama an chhuah a ngai thin a, chu chu BSF vang hian a theih tawh loh tih a sawi. Chhuna ramhnuaia an kal pawh, khaw thim hmaa haw hman a ngai a, hnathawhna hun an neih tlem phah tih a sawi bawk.
Khawtual mite tiduhdah zawng chuan an awm lo a, sual pawh an sual lo a, mahse sipaiin an veng reng mai hi mipui tan a buaithlak tih chu a sawi dan a ni.