BSF te’n raltlante kirtir leh
Bangladesh atanga Mizorama tlanchhiat tum mi engemaw zat chu BSF te’n an kirtir tawh a, tun hnaiah pawh an lo kirtir leh tih thu dawn a ni.
Raltlante pan ber Parva III atanga thu dawn danin, ni 10 vel kal taah khan BSF te’n Mizorama tlanchhiat tum mi 50 vel chu an kirtir leh a, an zingah hian naupang pawh an tel.
Parva III atanga kea darkar hnih vel kal Kantuli khua leh ramri inkarah BSF te’n BOP (Border Outpost) an nei a, chuta duty-te chuan Parva III luh tum raltlan mi 50 vel chu lo dangin an kirtir leh tih chu Parva III khawtlang hruaitute sawi dan a ni.
Bangladesh-a Chittagong Hill Tracts atangin nikum kum tawp lamah khan mi engemaw zat chu Mizoramah an raltlan a, nikum kum tawp lam atang vek khan BSF te’n an lo dang thin. Chuti chungin BSF hel thei mi engemaw zat chu a rukin Mizoramah hian an tlanlut tawh a, BSF te’n hun engemaw chen kirtir an neih loh hnuah tun hnaiah kirtir an awm leh a ni.
Bangladesh Relief Committee, Mizoram te’n an chhinchhiah danin, BSF te hian mi 900 vel lo dangin an kirtir tawh a, January ni 2-a an kirtirte phei chu 550 an tling.
An chhinchhiah danin, December ni 4 khan Kantuli khua atangin mi 100 an kirtir a, December ni 5-ah Kantuli atang bawkin mi 120, kumin January ni 2-ah Semmeisora khaw bul atangin mi 550, January 3-ah Simmeisora khaw bul atang bawkin mi 162, January ni 5-ah Parva III leh Banduk khaw inkar atangin mi pakua an kirtir tawh.
Chittagong Hill Tracts hi an la ralmuang lo a, Mizorama tlanchhiat tum, inpeih sa ata awm pawh mi engemaw zat an awm reng tih thu dawn a ni. BSF hel a ngai a, kawng pangngai ni lova kal te a ngai a, hei vang hian an duh hunah an che chhuak thei lo nia sawi a ni.
BSF te’n raltlante kirtir leh
Get real time updates directly on you device, subscribe now.