BTS World Tour Arirang ticket a sold out

BTS chuan niminpiah khan an comeback world tour neih tur ‘BTS World Tour Arirang’ ticket an zuar chhuak tan ta a, fans maktaduai tel chu ticket chan loh hlauhin ticket booking tih hmasak tumin an buai hle a. An zawrh chhuah atanga darkar rei lote chhungin an concert-na tur hmun tam zawka ticket chu an hralh zo nghal vek.
Kum li dawn chawlh lain, group angin che chhuak tawh lo mah se an rawn comeback tur boruak chu an chawlh hma nen a danglam tehchiam dawn lo a nih hmel khawp mai. South Korea inrelbawlna dana mipa pangngai te kum 18 leh kum 30 inkara sipai-a thla 18 tal an tan vek a tul avanga 2022 atanga chawlh an lak hnua an world tour neih leh hmasak ber a ni dawn a, kum li dawn chawl mah se an huhang a la dai chuang lo tih a chiang e.
Report hrang hrang atanga a landanin he an tour neih tura sum chevel pawh a pui tham dawn hle a, concert ticket hralhna bakah merchandise, licensing, album sales leh streaming vel atangin thla 12 chhungin dollar tluklehdingawn revenue an nei thei dawn niin an chhut.
BTS hian an album thar ‘Arirang’ pawh March thlaah an tlangzarh dawn a nih kha. Hei pawh hi RM, Jin, Suga, J-Hope, Jimin, V leh Jungkook ten 2022 hnua group anga an album tlangzarh leh hmasak ber a ni ang.
BTS World Tour Arirang hi April ni 9, 11 leh 12-ah Goyang Stadium-a zan thum concert neiin an kick-off ang a, Goyang show zan thum atana ticket awm zawng zawng hi niminpiah a official fan-club presale chhungin an inchuh zo nghal vek.
April ni 17 leh 18-ah Tokyo Dome-ah show an nei leh ang a, chumi hnuah North America, Europe, South America leh Asia te an hrut kual leh ang. He tour-ah hian show vawi 79 nei turin an ruahman kha a ni a, mahse, ticket chang lo an tam tak em avangin US-ah hian show tum hnih an belh leh a, tihian khawpui 34-ah show vawi 81 an nei dawn ta a ni.