Buai awmna tih lohah sawrkarin sawhthing man a pe tla vek tawh
Secondary Collection Centre thenkhata sawhthing lei leh hralha buaina awm tih loh, hmun dang zawngah chuan sawrkarin support price a pek tur a pe tla vek tawh. The Aizawl Post-in a zawhnaah Agriculture & Farmers’ Welfare minister PC Vanlalruata chuan, buai awmna tih loh zawngah chuan sawrkarin sawhthing man a la pek loh a pe vek tawh a, hemi kaihhnawiha lungawilohna nei chuan anmahni awmna District Agriculture Marketing Committee hnenah thlen theih a ni tih a sawi.
Kumin chhung khan district 11-ah sawrkarin sawhthing kg. 3,38,35,182 a lei a; sawhthing chingtute hnena a pek hi Rs. 1,37,72,04,477.50 a ni tih a sawi a ni.
SSC thenkhata sawhthing lei leh hralh chungchanga engemaw felhlel awm chu tunah hian an buaipui tan mek tih a sawi bawk.
Kumthar lamah pawh sawrkarin support price tur hi sum a dahhrang dawn a, pek erawh a ngaih an ring lo zawk tih State Agriculture Marketing Board chairman PC Vanlalruata hian a sawi a. “Sawhthing hi kuminah India ram pumah a rate a chhiat avangin kum tharah hi chuan India ram hmun dangah an ching tha vak duh dawn lo tih an sawi a. Support price kan pek thin aia sangin sawhthing chingtuten an hralh theih ngei kan ring. Rate a chhiat palh hlauh erawh chuan support price pek tur kan ruahman leh anga, chief minister hoin a rate hi chu final a ni ang,” a ti.
Minister chuan kumin December 5 & 6 hian Aizawlah sawhthing buyer seller meet an huaihawt dawn a. India ram chhung leh ram pawn thlenga sawhthing lei leh hralh lama sumdawngmi leh a sawngbawltute an rawn tel dawn tih a sawi a ni.
Sl.No. District Quantity
(kg) Total Payment
(Rs)
1 Saitual 47,54,681 19,68,61,139/-
2 Serchhip 62,47,923 24,37,18,183/-
3 Mamit 9,88,252 4,57,34,550/-
4 Aizawl 18,40,333 9,98,85,980.50/-
5 Lunglei 32,94,162 11,14,50,426/-
6 Siaha 2,92,222 1,45,86,246/-
7 Champhai 82,26,841 33,79,78,405/-
8 Kolasib 3,88,269 1,94,13,470/-
9 Lawngtlai 3,82,669 2,09,88,450/-
10 Khawzawl 56,10,817 21,65,57,093/-
11 Hnahthial 18,09,013 7,00,30,535/-
Grand Total 3,38,35,182 1,37,72,04,477.50/-