Buaina kara awm, raltlan leh hruai hawte enkawl dan tur rel

Buaina kara awm, raltlan leh
hruai hawte enkawl dan tur rel
Mizorama medical association hrang hrang – Indian Medical Association, Mizoram Government Doctors Association leh Non-Government Hospital Association of Mizoram hruaitute chu Thawhtanni khan Health minister Dr R Lalthangliana hoin an thukhawm a. Tualchhung buaina avanga Mizoram mi Manipur-a tangkhangte, Manipur-a Zohnahthlak awmte leh sahimna zawnga lo tlante dinhmun an ngaihtuah.
Health minister chuan sahimna zawnga rawn tlante chu chhawmdawl zel an nih tur thu a sawi a. Mizoram medical doctor-ten Churachandpur Civil Hospital tanpuina tura cheng nuai 7 chuang an thawhkhawm chu entawntlak a tih thu leh, damdawi tam tham tak thawn chhoh a nih thu te sawiin, tun ang boruakah tangkhang leh hliamte ngaihsak leh ngaihpawimawhna lantir zel a ni chu lawmawm a tih thu a sawi. Churachandpur Hospital medical superintendent leh doctorte nen an inbiak thu sawiin, tun dinhmunah harsatna an tawk lem loa, Mizoram atanga damdawi thawn chungchangah lawmthu an lo hrilh tih a sawi a ni.
Manipur addl. chief secretary nena an inbiaknaah boruak muanawm a awm thuai theihna’n theihtawp chhuaha tan tlan a tul thu an sawidun tih Dr R Lalthangliana hian a sawi a. Manipur-a Mizo zirlai leh hnathawka awmte chu Mizorama hruai haw mek an nih thu leh reiloteah an haw kim tur thu a sawi bawk.
Inkawmhonaah hian Mizoram mi hruai haw chungchang, a tul anga chhawmdawl hnathawh dan tur, Mizorama Meitei lehkha zir leh hna thawka awmte himna tur sawi ho a ni a. Manipur leh Mizoram ramria khua awmte thawmthat leh mamawh chakkhai lam kawngah harsatna an tawh lohna’na hmalak dan tur an rel.
Heng bakah hian India rama nurse hnathawk tha bikte hnena hlan thin ‘Florence Nightingale Award’ Mizoram nurse-te atanga dawng pha chinte chawimawi dan tur an rel bawk.