Buaipui tham basketball Nizan inkhel hmasa zawkah Zarkawt BCA chak

Hawla Indoor Stadium, Republic Vengthlanga MSL 11 khelh mek chuan hlut a hlawh hle a; tualchhung super star Lalrina Renthlei a inlan lo erawh fans tihrilhhaitu a ni.
Nizan match hmasa zawkah Zarkawt BCA chu a zawna a tum thum nan 81-65-in an chak leh a, an hneh tak Saron BC hi hneh lo nei lova kaltluang lai an ni.
Tun inelnaa chetha tak Lalnunpuia Renthlei (R-a) chuan player of the match a hlawhchhuak; Saron BC tan Zarkawt BCA hi an la lian hret a ni.
MSL 11 nghawng a tha
Sikul naupang chawl, in lama tawma internet thahrui hmanga games khel thin tam takin pawn lam boruak hip a, ni sa vawl vawl hnuaia an thlantui luang ngiai ngiai an han hru thin leh Zo thlifim thaw heuh heuh kara an inkhel thin hmuh hian MSL 11 nghawngchhuah a ni tih hairual a ni lo!
Nu leh pa hawiharh chinin sawngnawi zeta an fate pindan chhungrila tawm kuk that lohzia an hmu thiam deuh deuh a, pawn lam boruak tem (outdoor activity) thatzia kawhhmuh nan MSL lama tualchhung player-te pian, hmelhmang leh hrisel zette kawhhmuh nachang an hre ta tlat!
Hoops Mania Timeout
MSL 11 hian veng thenkhata an tualchhung local council member vengva chinte thinlung a hawlh a, thalaite hmakhaw ngaitu ther fur zingah Armed Veng South, infiamna uar venga Pu Vanlalhlua Colney chuan an veng basketball court cheithat nan sum a thehchhuak – hetiang tih nachang hria hi thalaiten an theihnghilh mai mai tawh ngai lo. The Aizawl Post Hoops Mania chuan kan chhuang takzet e.
Social media lama thu hraw leh hrawl hrep hruapa mi thin khei zawk zawk type mual mual thei reng maite’n endawng an hlawh mek; taksa sawizawi intihhmuh nachang hriate’n entawn an hlawh mek thung.
Tho la, thlan titla ve ta che.
Zanina inkhel turte:

Chhinga Veng Vs MSV Hotshots
Chanmari BC Vs Tuikual South BC