Bualte dai kawng la tlang lo

Lunglei leh Lawngtlai inkar, National Highway-54 Bualte leh Thualthu inkara leimin chu theih ang angin a thenfai hna thawh reng ni mah se, lei hi a tlak leh thin avangin lirthei ala tlang thei meuh lo.
Helai leimin hi August 4 chawhnu khan LMV chin tana kal theiha tih tlang ni mah se, August 5 chawhma lam khan lei a tlak leh avangin a ping zui a, kawng chhuat a bal tel bawk avangin a thenfai hna a tibuai zual a, Nilaini pawh khan kawng hi tih tlang zuai ni mah se, LMV tan pawh kal harsa a nih avangin khar rih a ni.
District Disaster Management Authority (DDMA) Lunglei chairman, bawrhsap Navneet Mann chuan mipui hriat tur thuchhuah siamin, Bualte leh Thualthu leimin avang hian khualzin tam takin harsatna an tawk mek a. Leiminna hmun hi laih tlang a nih hunah pawh a min belh theihna lai a la tam a; fur lai a nih avangin thenfai hna a chak thei loa, hnathawktute himna tur leh chhiatna dang thleng thei laka inven tel a ngaih avangin fimkhur a ngai hle tih a swi a ni.
Hetiang hi kawngpui dinhmun a nih rih avangin helai kawng hi khualzin turte tan zawh a him rih lo tih an inhriattir tih sawiin, Lunglei piahlam Lawngtlai /Siaha district mi leh district dang atanga Lunglei piahlam kal tumte tan Sangau kawng lama kal rih turin an inngen tih a sawi a ni.