Buara bag lakkhawm sawhthing dahna tur

Buara bag lakkhawm
sawhthing dahna tur
Ration buhfai dahna buara bag sawrkarin a lakkhawm chu thlai thar hralh tur, sawhthing leh thlai dang chingtute hman atana sawrkarin a ruahman dawn tih sawi a ni.
Food, Civil Supplies & Consumers Affairs department thuchhuah chuan, mipui hnena ration buhfai buk dik pek a tumna kal zelah retailer-te hnen atanga ngenna a dawn angin, buhfai bag rihna gram 580 hi kudam-ah paih (cut) thin tawh tur a ni a, retailer-ten buk dika buhfai an pek chhuahnaah buara bag rihna paih loh hi chhuanlamah an hmang thei tawh lo tih a sawi.
Retailer-ten mipui hnena buhfai an pekin buara rihna, a bukna hmanraw rihna chhiar tel tur a ni loa, retailer-te hnen atanga buara bag (jute bag) lakkhawm hi loneitute (sawhthing chingtute adt) tana hman turin sawrkarin a ruahman dawn tih a sawi bawk.
Retailer-ten digital weighing scale (DWS) hmang vek tawh turin a hrilh nawn a. An hmang lo a nih chuan dan anga hma lak a ni dawn tih a sawi.
Mizoram sawrkarin card vara dinhmun harsa la awmte puala buhfai kg. ah Rs.20-a an khul theihna tur card sen a duan chu mimal emaw pawl ho ang emaw pawhin mahni awmna DCSO ah ziakin dilna thehluh theih a ni tih a sawi a ni.