Budget-ah Kuthnathawktute

Kum 2025-26 chhunga Mizoram sum hmuh dan tur leh hman dan tur (annual financial statement) chu nimin khan House-ah finance changtu Pu Lalduhoma chief minister chuan a pharh ta a. Kum 2025-26 atana sum ruahman hi cheng Vbch 13,835.42 a ni a, kum hmasa aia a tlem zawk chhan chu budget pharhtuin a sawifiah vek tawh avangin helai hmun zim teah hi chuan kan tuihnih tawh lovang.
Kalphung thar tiamtu an ni bawk a, tun sawrkar hian thil thar a chhawp chhuak chho mek a. Tun tum budget-ah pawh hian, tunhmaa chiang fek fawka budget-a tarlan ngai loh thil thar a awm nual a. Handholding Scheme hnuaia thlai thar pali chu kan hre bel viau tawh a, tun tum budget-ah hian ‘Mizo thar buhhum leina’ a lo lang thar ve leh a. Public Distribution System kalpui chungchanga hmalakna thar avanga buhfai quintal 46,000 zet hum a nih thu pawh budget speech-ah hriat tur a awm a. Tuialhthei atanga Road Maintenance Cess leh Social Infrastructure and Service Cess cheng vaibelchhe 15 (nuai 1500) hmuh beisei chu a hmanna tur ruahman bik atan chauha hman tur a nih thute pawh hriat tur a awm a. Hei bakah hian administrative reform hrang hrang hriat tur a awm bawk.
Annual budget pharh apianga ngaihven hlawh pakhat chu, hmasawnna hna thawhna atan sum engzat nge ruahman theih a nih? tih hi a ni awm e. Kan state-in kan thawk chhuak tlem, tax devolution-ah kan sang ve thei lo, kan ti thin a. Chuti chung chuan sawrkar hnathawk hlawh leh department hrang hrang enkawlna atana sum chheh hran chu budget pumpui chanve aia sang daih a ni deuh zel. Tun tumah pawh hian Salaries leh Pension atan chauh 30.54% leh 14.81% dah hran a ngai a, department enkawlna neuh neuh nen chuan 70% vel a ni chho dawrh awm e. Hmasawnna lam hawi – Infrastructural Assets leh Investment atan 3.16% leh Other Capital Expenditure atan 12.10% dah a ni ve thei hram a ni.
Budget-ah Kuthnathawktute puala sum chheh hran hmuh tur a han awm ta hi a tam leh a tlem chu thuhran ni se, a lawmawm hrim hrim e.