Buffet-an a ro sem dan tur thlak

Warren Buffett chuan a thih hnua a ro sem dan tura ruahmanna a siam chu a ennawn thu a sawi a. Bershire Hathaway chairman Buffett hi kum 93-a upa a ni tawh a. Wall Street Journal te hnenah a rochhiah a ennawn thu leh a thih hnuah chuan a ro chu Bill & Melinda Gates Foundation-ah pek a nih loh tur thu sawiin a hausaknate chu a fa pathum te charitable trust enkawlah sem darh a ni ang, a ti.
“Ka thih hnuah Gates Foundation in sum an dawn chhunzawm lovang” tiin Buffett chuan a sawi.
Buffett chuan a ro sem darh dan tur chu tum tam a ennawn tawh thu sawiin tunah a thlak danglam lehna chhan pawh a fate values leh theihnaah rinna a nghah ngam tak vang a ni tiin a sawi. A fate pathum hian philantrophic organisation an nei vek a ni.
“Ka fate pathum value-ah ka lawm em em a, thil an kalpui danah anmahniah rinna 100% in ka nghat tawh” tiin Buffett chuan a sawi.
A hma chuan Buffett chuan a estate 99% te chu Bill&Melina Gates Foundation leh family pali – Susan Thompson Buffett Foundation, Sherwood Foundation, Howard G. Buffett Foundation leh NoVo Foundation tena philantrophic thila an hman turin a dah a ni.
Mahse tunah chuan a ro thlak danglamin Buffet chuan a dam chhung zawng chuan Gates Foundation ah sum a la pek reng tur thu a sawi thung a.
Berkshire Hathaway chuan karkalta Zirtawp khan a Class A share 9.000 chu Class B share 13 million chuangah thendarhin heng zing atanga 9.3 million shares vel chu Bill & Melinda Gates Foundation Trust te chan tur niin a bak a la bang zawng chu Buffett family charity pali-ah sem darh a ni ang.
“Warren Buffett hian thilphal takin Gates Foundation hnenah kum 18 chhung contribution neiin thurawn a pe tawh a ni” tiin Mark Suzman, foundation chief executive chuan a sawi a. “Tun hnai lawkah pawh $43 billion chu kan hnathawh kalpui zel nan min pe a ni” tiin a sawi.
Nikum khan Buffett chuan an chhungkua charity pawl pali hnenah $870 million a thawh a, kum 2022 khan $750 million vel a thawh thung.
Buffett hian berkshire Hathaway Class A shares 207,963 leh Class B shares 2,586 la neiin heng a share belhkhawm hlutlam hi $128 billion vel a ni.